Papa ABŞ və sionist rejimin İrana qarşı müharibəsini ədalətsiz adlandırıb
“İQNA”-nın "Anadolu" agentliyinə istinadən verdiyi məlumata görə, Papa XIV Leo şənbə günü Romadan Madridə gedərkən ABŞ və İsrailin İrana qarşı müharibəsinin legitimliyi ilə bağlı suala cavab verərkən bildirib ki, bu münaqişəni "ədalətli müharibə" nəzəriyyəsi çərçivəsində əsaslandırmaq olmaz.
Vatikan heyətinin olduğu təyyarədə jurnalistlərlə söhbət edən Vatikan rəhbəri deyib: "Bu halda heç bir ədalətli müharibə mövcud deyil."
Papa əlavə edib: "Ədalətli müharibə nəzəriyyəsi keçmiş əsrlərə aiddir; o dövrə ki, bəşəriyyət hələ müasir silahların dağıdıcı miqyası və onların genişmiqyaslı məhvetmə potensialı ilə tanış deyildi."
Katolik dünyasının liderinin bu bəyanatları ABŞ vitse-prezidenti Cey Di Vensin çıxışına reaksiya olaraq səslənib. Vens bundan əvvəl Vaşinqtonun Tehrana qarşı hərbi əməliyyatlarını müdafiə etmək üçün "ədalətli müharibə" anlayışına istinad etmişdi.
Papanın son mövqeyi onun Yaxın Şərqdə gərginliyin artması və İrana qarşı müharibə ilə bağlı tənqidləri fonunda qiymətləndirilir. O, son aylarda dəfələrlə münaqişələrin dayandırılmasını və tərəflərin diplomatik həll yollarına yönəlməsini tələb edib, həmçinin müharibənin genişlənməsinin nəticələri barədə xəbərdarlıq edib.
Vatikan rəhbəri daha əvvəl də Donald Trampın İrana qarşı fikirlərini tənqid edərək, ABŞ prezidentinin "İranda heç bir sivilizasiya qalmayacaq" hədəsini "qəbuledilməz" adlandırmışdı.
Tramp isə cavabında Papanı "zəif" və "xarici siyasəti düzgün anlamamaqda" günahlandırmışdı. Buna baxmayaraq, XIV Leo sülhün müdafiəsi və müharibəyə qarşı mövqeyindən geri çəkilməyəcəyini vurğulayıb.
Bu şifahi gərginlik İtaliyada da geniş əks-səda doğurub və bu ölkənin bir sıra siyasi rəsmiləri Papanın mövqeyini dəstəkləyiblər. İtaliyanın Baş naziri Corciya Meloni Vatikan rəhbərinə qarşı səslənən tənqidləri "qəbuledilməz" hesab edib.
Papa XIV Leo İspaniyaya bir həftəlik səfərinə başlayarkən Madridin Kral Sarayında keçirilən rəsmi qarşılanma mərasimində bu ölkənin beynəlxalq hüququ, sülhü və xalqlar arasında həmrəyliyi dəstəkləmək yanaşmasını yüksək qiymətləndirib.
O vurğulayıb ki, dünyanın artan böhranlar, müharibələr və qeyri-sabitliklə üzləşdiyi bir şəraitdə sülhün müdafiəsi hər zamankından daha zəruridir.
4356653
