Kərbəlada Beynəlxalq Quran Həftəsinin açılışı
“İQNA”-nın İraq bürosunun məlumatına görə, bu proqram İraqın dini mərcəiyyətinin nümayəndəsi Şeyx Əbdülməhdi Kərbəlayi və İmam Hüseyn (ə) müqəddəs ziyarətgahının rəhbəri Həsən Rəşid əl-Abayçinin iştirakı ilə öz işinə başlayıb.
Elmi hövzənin ustadı Seyid Riyad Səid əl-Həkim İmam Hüseynin (ə) hərəmində keçirilən Beynəlxalq Quran Həftəsinin açılış mərasimində çıxış edərək bildirib: "Müqəddəs Quran İslamın əbədi möcüzəsi, müxtəlif dövrlərdə İslam ümmətinin kimliyinin qoruyucusu və onun mesajını bəşəriyyətə çatdırmaq və hidayət etmək üçün təsirli bir vasitədir."
O, əlavə edib: "Müqəddəs Quran ümmətin həyatında əsaslı rollar oynayır və əbədi bir möcüzə olaraq İslamın mesajının əbədiyyətini bütün dünyaya çatdırır."
Səid əl-Həkim həmçinin qeyd edib ki, Peyğəmbərin (s) risalətindən on dörd əsrdən çox vaxt keçməsinə baxmayaraq, Quran müsəlmanların etiqadi prinsiplərinin qorunmasında rol oynayıb və İslam kimliyinin müdafiəsində əsas amil olub.
O əlavə edib: "Quranın üçüncü rolu onun qəlblərə və ağıllara birbaşa təsirindədir; çünki o, öz fəsahəti, bəlağəti və təsirli üslubu ilə seçilən bir kitabdır."
Elmi hövzənin bu ustadı bildirib ki, tilavətə diqqət yetirmək, qiraəti, səs və ləhnin təkmilləşdirilməsi Quranın cəmiyyəti hidayət etmək mesajı və hədəfləri ilə sıx bağlıdır.
O, sözlərinə belə davam edib: "Quran tədbirləri və fəaliyyətləri müsəlmanların Müqəddəs Quran çətiri altında birləşməsinə və onların ortaq dəyərlərinin güclənməsinə kömək edir."
Əl-Həkim vurğulayıb ki, belə təşəbbüslər fərqli rəy və təfsirlərə baxmayaraq, İslam ümməti üçün birləşdirici bir mühit yaradır.
Kərbəla Beynəlxalq Quran Həftəsi İraqın daxilindən və xaricindən olan Quran fəallarının geniş iştirakı ilə İmam Hüseynin (ə) müqəddəs ziyarətgahında keçirilir və məqsədi Quran mədəniyyətini yaymaq və cəmiyyətdə Müqəddəs Quranın varlığını gücləndirməkdir.
İyunun 11-nə qədər davam edəcək bu Quran həftəsi proqramına Kərbəla Beynəlxalq Quran Tilavəti və Əzbəri üzrə 5-ci mükafatın təqdim edilməsi, 1-ci beynəlxalq gənc istedadlar müsabiqəsi, 4-cü Beynəlxalq Ərəb Xəttatlığı sərgisi, eləcə də bir sıra elmi, mədəni və bədii ixtisaslaşdırılmış tədbirlər daxildir.
4356719
