Rusiyada diabet və piylənmənin müalicəsi üçün ilk halal dərmanların istehsalı
"İQNA" xəbər agentliyinin "gxpnews"a istinadən verdiyi məlumata görə, Rusiyanın "Geropharm" əczaçılıq şirkəti 2-ci tip diabetin müalicəsi və çəkiyə nəzarət üçün nəzərdə tutulmuş dərmanları üçün halal sertifikatı əldə edib. Bu sənəd Rusiya Federasiyası Müsəlmanları Ruhani İdarəsinin tabeliyində olan Beynəlxalq Halal Standartlaşdırma və Sertifikatlaşdırma Mərkəzi tərəfindən şirkətə təqdim olunub. Nəticədə, bu istehsalçının dərmanları Rusiyada İslam meyarlarına uyğun gələn ilk GLP-1 sinfinə aid dərmanlar olub.
Halal sertifikatı tərkibində qadağan olunmuş maddələr - o cümlədən etanol, qan, donuz hüceyrələri və toxumaları, habelə İslam şəriətinə görə kəsilməmiş heyvanlardan alınan komponentlər olmayan dərman vasitələrinə verilir. Bu dərmanların istehsalı heyvan mənşəli xammaldan istifadəni tamamilə istisna edən peptid sintezi metoduna əsaslanır.
İslam dini etiqad edənlərin sayına görə Rusiya Federasiyasında ikinci ən böyük dindir. Bir çox xəstələr üçün müalicə seçərkən halal sertifikatının mövcudluğu həlledici amilə çevrilir və həkimlərə əlavə dini məhdudiyyətlər olmadan bu dərmanları təyin etməyə imkan verir.
Daha əvvəl, 2024-cü ildə "Geropharm" şirkəti Rusiyada öz insulin istehsal xətti üçün halal sertifikatı alan ilk əczaçılıq şirkəti olmuşdu. O zaman şirkət bildirmişdi ki, onun müasir insulinləri heyvan mənşəli deyil, mikroorqanizmlərdən istifadə edilməklə sintez olunur ki, bu da donuz insulininin tarixi istifadəsi ilə bağlı dini məhdudiyyətləri aradan qaldırır.
Rusiya Federasiyası Müsəlmanları Ruhani İdarəsinin nəzarəti altında fəaliyyət göstərən Beynəlxalq Halal Standartlaşdırma və Sertifikatlaşdırma Mərkəzi Rusiyada məhsulun İslam normalarına uyğunluğunu təsdiqləyən yeganə səlahiyyətli qurumdur.
4360651
