Vatikan Avropa İttifaqını ikili standartlarda ittiham etdi
“İQNA”, "Anadolu" agentliyinə istinadən xəbər verilir ki, Katolik Kilsəsinin Doktrina üzrə Ali Qurumunun rəhbəri Viktor Manuel Fernandes Avropa İttifaqının beynəlxalq münaqişələrə yanaşmasını tənqid edərək, bu bloku beynəlxalq hüququ seçici şəkildə tətbiq etməkdə ittiham edib. O bildirib: "Bəzi ölkələr sanksiyalarla üzləşdiyi halda, digərlərinə insan hüquqlarını və demokratiyanı pozmalarına baxmayaraq, maliyyə və hərbi yardımlar göstərilir".
O, 14-cü Papa Leonun bütün dünyadan olan kardinallarla müharibə və müasir münaqişələr qarşısında Katolik Kilsəsinin rolu haqqında keçirdiyi qapalı iclasın açılışında beynəlxalq hüququn tətbiqində "ikili standartlar" adlandırdığı yanaşmanı tənqid edib.
Papanın dəvəti ilə keçirilən bu fövqəladə iclasın məqsədi onun "müasir müharibələrin formalaşmasında qlobal güc mədəniyyəti" adlandırdığı məsələni araşdırmaq, habelə Katolik Kilsəsinin "ədalətli müharibə" haqqındakı ənənəvi doktrinasına yenidən baxmaqdır.
Fernandes bildirib: "Dövlətlər əxlaqi və hüquqi prinsipləri əvvəlkindən daha çox siyasi mülahizələrə əsaslanaraq şərh edirlər".
O qeyd edib: "Əgər bir ölkə düşmən hesab edilirsə, qeyri-demokratik elan olunur və müxtəlif üsullarla sanksiyalara məruz qalır; lakin əgər müttəfiqdirsə, onda ifadə azadlığının olmaması, insan hüquqlarının pozulması və ya demokratiyanın çatışmazlığı görməzdən gəlinir".
Avropa İttifaqına işarə edən Vatikanın bu yüksək vəzifəli şəxsi əlavə edib: "Bu ittifaq bəzi ölkələrə sanksiya tətbiq edib, lakin eyni zamanda digərlərinə maliyyə və hərbi yardımlar göstərib".
O vurğulayıb ki, bu ziddiyyətlər göstərir ki, praktikada dövlətlərin mövqeləri sabit və universal dəyərlərə deyil, dünyanın müxtəlif regionlarının siyasi və iqtisadi maraqlarına tabedir.
4360914
