Malayziya İslam Şurasının şəhid rəhbərin dəfn mərasimi münasibətilə bəyanatı
“İQNA”-nın Malayziyadan verdiyi məlumata görə, Malayziya İslam Təşkilatları Məşvərət Şurasının (MAPIM) rəhbəri Əzmi Əbdülhəmid, İslam İnqilabının şəhid rəhbəri Ayətullahul-üzma İmam Seyid Əli Xameneinin (qüddisə sirruh) dəfn mərasimi münasibətilə aşağıdakı bəyanatı yayıb:
Ayətullahul-üzma İmam Seyid Əli Xameneinin (r.ə) şəhadəti sadəcə milli bir liderin vəfatı deyil. Bu hadisə dövlət terrorizmi, siyasi qətl və beynəlxalq münasibətlərdə cəzasızlığın təhlükəli şəkildə normallaşdırılmasının ağır nəticələrinin ciddi bir xatırlatmasıdır.
ABŞ və İsrail rejiminin təcavüzü vasitəsilə həyata keçirilən bu hədəfli terror, beynəlxalq hüququn pozulması modelinin yeni bir fəslini göstərir. Belə əməllər heç bir "özünümüdafiə" və ya "milli təhlükəsizlik" doktrinası ilə əsaslandırıla bilməz.
Beynəlxalq ictimaiyyət terroru xarici siyasət aləti kimi qanuniləşdirmək cəhdlərini pisləməlidir. Güclü ölkələr siyasi və dini liderləri cavabdehlik qorxusu olmadan məhv edə bildikdə, beynəlxalq hüququn bütün çərçivəsi zəifləyir. Belə cinayətlərə qarşı susmaq, onlara şərik olmaq deməkdir.
Bu dəfn mərasimi göstərir ki, liderlər şəhid ola bilsələr də, onların amallarını zorakılıqla məhv etmək mümkün deyil. Tarix dəfələrlə sübut edib ki, zülm və sitəm, insanların ədalət, ləyaqət və milli müstəqilliyi müdafiə etmək əzmini daha da gücləndirir.
MAPIM beynəlxalq ictimaiyyəti, hökumətləri, vətəndaş cəmiyyəti təşkilatlarını və insan hüquqları müdafiəçilərini aşağıdakıları tələb etməyə çağırır:
1. Terror faktı və bütün məsul tərəflər haqqında müstəqil beynəlxalq araşdırma aparılması.
2. Beynəlxalq humanitar hüququn və insan haqlarının pozulmasına görə cinayətkarların tam şəkildə məsuliyyətə cəlb edilməsi.
3. Məhkəmədənkənar qətllər və siyasi terror siyasətinə son qoyulması.
4. İkili standartlar olmadan beynəlxalq qanunların bərabər şəkildə tətbiq edilməsi.
5. Beynəlxalq nizamın daha da pozulmasının qarşısını almaq üçün konkret hüquqi tədbirlərin görülməsi.
Müsəlman ümməti və bütün vicdanlı insanlar harada baş verməsindən asılı olmayaraq, ədalətsizliyə qarşı mübarizədə sabitqədəm olmalıdırlar. Seçmə ədalət – ədalətsizlikdir. Seçmə cavabdehlik isə cəzasızlığın özüdür. Əgər dünya siyasi terroru adi bir hal kimi qəbul edərsə, heç bir millət və heç bir lider qanunsuz təcavüzdən sığortalanmayacaq.
Beləliklə, şəhid rəhbərin dəfni İrandan kənara çıxan bir mesaj göndərir. Bu, bəşəriyyət üçün bir xəbərdarlıqdır ki, şərikçilik, cəzasızlıq və cavabdehlikdən yayınma heç vaxt yeni beynəlxalq norma kimi qəbul edilməməlidir.
Məhəmməd Əzmi Əbdülhəmid, Malayziya İslam Təşkilatları Məşvərət Şurasının (MAPIM) rəhbəri.
4361962
