Amerika xalqı Trampın İranla müharibəsi haqqında nə düşünür?
“İQNA”-nın "Washington Post"-a istinadən verdiyi xəbərə görə, ABŞ İrana qarşı ilk hücumunu həyata keçirəndə Tramp bu müharibənin cəmi bir neçə həftə çəkəcəyini demişdi; lakin beş ay keçməsinə baxmayaraq, atəşkəslər biri digərinin ardınca elan edilib və sonra pozulub, hücumlar dayanıb və yenidən başlayıb. Neft tankerləri üçün həyati əhəmiyyət kəsb edən Hörmüz boğazının tez-tez bağlanıb-açılması səbəbindən yanacağın qiyməti kəskin şəkildə artıb.
"Washington Post" və "Ipsos"un yeni keçirdiyi sorğuya əsasən, Amerika xalqının əksəriyyəti Trampın bu sahədəki fəaliyyətini bəyənmir. Bundan əlavə, sorğuda iştirak edənlərin çoxu inanmır ki, aparılan danışıqlar yanacaq qiymətlərini normal səviyyəyə qaytara bilsin.
Virciniya ştatının Vudbric şəhərindən olan, Demokratlar partiyasının tərəfdarı və sorğuda iştirak etmiş 58 yaşlı dəriyə qulluq üzrə mütəxəssis Lori Oksendein deyib: "Hər şeyin qiyməti göylərə qalxıb. Bu, həqiqətən yorucudur. Xəbərləri oxuyuram və baş verənlərdən geri qalmamaq üçün izləyirəm, amma hər anını da təqib etmirəm. Bu müharibə ölkəyə, iqtisadiyyata və işçi sinfinə böyük təzyiq göstərir. Belə görünür ki, varlılar daha da varlanır, yoxsullar isə daha da yoxsullaşır."
Texas ştatının Port-Aransas şəhərindən olan, təqaüdçü və Hərbi Hava Qüvvələrinin veteranı, müstəqil baxışlı 72 yaşlı Brayan Alender isə belə deyib: "Televizorda başqa hər şeydən çox bu mövzudan danışılır; gündəlik xəbərlərdə əsas mövzu müharibədir. Məncə, bu, prezidentimizin şəxsiyyətinin zəifliyinin daha bir əlamətidir. O, razılaşmaların ehtimalı və Hörmüz boğazının vəziyyəti haqqında dəfələrlə yalan danışıb. Gələn həftə yenidən başqa bir potensial razılaşma xəbərini eşitsəm, təəccüblənmərəm."
O, əlavə edib: "Dua edirəm ki, iş minlərlə hərbi qulluqçunun göndəriləcəyi yerə çatmasın. İstəmirəm ki, bu hadisə Əfqanıstan kimi olsun. Məni narahat edən odur ki, müharibəyə girək və bir daha oradan çıxa bilməyək."
Nyu-York ştatının Tonavanda şəhərindən olan, Respublikaçı və xəstəxana xidmətləri əməkdaşı 41 yaşlı Lora Maylz da "Washington Post-Ipsos" sorğusunun suallarını cavablandırarkən deyib: "Tramp atəşkəs elan etdi, sonra geri çəkildi və yenidən eyni şeyi etdi. Məncə, əgər bir söz deyirsinizsə, onun arxasında durmalısınız. Bu mövzu mənim üçün şəxsi xarakter daşıyır, çünki 18 yaşlı oğlum var və məcburi hərbi xidmətin yenidən bərpa olunacağından narahatam."
O, fikrini belə tamamlayıb: "Mən ölkəmizin azadlığını müdafiə etməyə inanıram, lakin istəmirəm ki, 18 yaşlı oğlum başqalarının işlərinə qarışmağımız səbəbindən çıxan müharibəyə getsin. Bu, həqiqətən qorxuncludur. Bu müharibənin sonu varmı? Qaranlığın sonunda bir işıq görünür? Ümumiyyətlə, nə baş verir?"
4364907
