Kərbəlada 700-dən çox jurnalist və media işçisinin iştirakı ilə Ərbaəin mərasiminin işıqlandırılması
"İQNA"-nın "Şəfəq Nyus"a istinadən verdiyi məlumata görə, Kərbəla valiliyinin İctimaiyyətlə Əlaqələr və Kommunikasiya direktoru Tofiq əl-Həbbəli, yerli, ərəb və xarici jurnalistlərə xidmət göstərmək üçün təchiz olunmuş bir media mərkəzinin yaradılması ilə Ərbaəin ziyarəti üçün xüsusi media tədbirlərinin tamamlandığını açıqlayıb.
Əl-Həbbəli "Şəfəq Nyus"a müsahibəsində bildirib ki, Ərbaəin üçün nəzərdə tutulan media mərkəzində canlı yayım proqramları üçün xüsusi səhnə, internet xidmətləri, jurnalistlər üçün xüsusi istirahət yeri və Ərbaəin mərasimi ilə bağlı dəqiq statistika, rəqəmlər və məlumatlara çıxış imkanı mövcuddur.
O, izah edib ki, Kərbəla valiliyi şəhər boyu və ona gedən yollarda 23 peyk yayım qurğusu (SNG) yerləşdirib və hadisələrin canlı yayımlanması üçün texniki dəstək məqsədilə 18 "LiveU" cihazı medianın istifadəsinə verilib.
Əl-Həbbəli həmçinin qeyd edib ki, Ərbaəin ziyarətini işıqlandırmaq üçün müxtəlif millətlərdən olan 143 ərəb və xarici jurnalist və media işçisinin iştirakı ilə yanaşı, təxminən 600 jurnalist, media işçisi, fotoqraf və texniki heyət də bu mərasimin işıqlandırılmasında iştirak edir ki, bu da dünya mediasının Ərbaəin mərasiminə göstərdiyi böyük diqqətdən xəbər verir.
O, sonda vurğulayıb ki, Kərbəla valiliyi milyonlarla zəvvarın iştirak etdiyi Ərbaəin mərasiminin miqyasına uyğun olaraq, bu hadisənin uğurlu media işıqlandırılmasını təmin etmək üçün bütün zəruri texniki və lojistik imkanları və asanlaşdırıcı şəraitləri yaratmağa çalışır.
4367554
