“İQNA”, "Əl-Məsirə"yə istinadən xəbər verir ki, Yəmən Ənsarullah hərəkatının lideri Seyid Əbdülməlik Bədrəddin əl-Husi bu gün (cümə axşamı) yaydığı bəyanatda Qurani-Kərimin yandırılması kimi hadisələrə işarə edərək, bu hərəkətləri sionistlərin müqəddəs dəyərlərə, əxlaqi prinsiplərə, ədalət və xeyirxahlıq anlayışlarına qarşı aşkar düşmənçilik əlaməti adlandırıb.
O vurğulayıb: "Quranın düşmənləri onun nurundan və bəşəriyyət üçün həqiqətləri üzə çıxaran, insanları istibdad və zülmdən azad edən təlimlərindən qorxurlar".
Seyid Husi Quranı zülm, tüğyan və fəsadla mübarizə aparmaq, eləcə də cəmiyyətdə ədaləti bərqərar etmək üçün təməl vəsilə kimi təsvir edib.
Ənsarullah lideri sionist rejiminin Qəzzadakı cinayətlərinə və "Ceffri Epşteyn" işi ilə bağlı qalmaqallara işarə edərək, bunları Quranın öz düşmənləri haqqında dediklərini təsdiqləyən dəlillər kimi qiymətləndirib.
Seyid Husi Qurana qarşı təhqirlərin təkrarlanmasını İslam və müsəlmanlara qarşı düşmənçilik aktlarının bir hissəsi hesab edərək deyib: "Bu hərəkətlər müsəlmanlara qarşı aparılan 'yumşaq müharibə' və 'sərt müharibə' ilə paralel şəkildə həyata keçirilir".
O, bu cərəyanın hədəfləri arasında "Yaxın Şərqin dəyişdirilməsi", "Böyük İsrailin qurulması" və İslamın dünyanın digər bölgələrinə yayılmasının qarşısının alınmasını qeyd edib.
O, müsəlmanların bu hadisələr qarşısındakı vəzifəsini "dini məsuliyyət" adlandırıb və vurğulayıb: "İslam ölkələri Qurana qarşı təhqirlərin qarşısını almaq üçün ciddi mövqe tutmalıdırlar".
Ənsarullah lideri deyib: "Əgər İslam ölkələri Amerika və Qərb ölkələri ilə siyasi və iqtisadi əlaqələrini rəsmi və ciddi şəkildə azaltsalar, müsəlman xalqları da Amerika mallarını və sionistlərin hərəkətlərini dəstəkləyən ölkələrin məhsullarını boykot etsələr, bu ölkələri belə hərəkətləri dayandırmağa məcbur edə bilərlər".
Seyid Husi daha sonra müsəlmanların Qurani-Kərimlə əlaqələrini gücləndirmələrini istəyərək vurğulayıb: "Qurana diqqət yetirmək, onun müqəddəsliyini təsdiqləmək və onun təlimləri haqqında maarifləndirməni artırmaq müsəlmanların prioritetlərinin başında durmalıdır; xüsusilə də İslam düşmənləri Quranın müsəlmanlar arasındakı mövqeyini zəiflətməyə və onları onun hidayətindən uzaqlaşdırmağa çalışırlar".
O, həmçinin Yəmənin mövqeyinə işarə edərək bildirib: "Yəmən xalqı öz 'iman kimliyinə' görə Qurana ən çox əhəmiyyət verən xalqlardandır".
Seyid Husi etiraz aksiyaları, mədəni və maarifləndirici proqramlar, media fəaliyyətləri və iqtisadi boykotu bu yanaşmanın təzahürləri kimi sadalayıb.
Sonda Seyid Husi Qurana qarşı təhqirlərə qarşı mübarizə və bununla bağlı tədbirlərin Yəmənin mədəni və təbliğati proqramlarında, xüsusilə də İslam peyğəmbərinin mövlud günü ərəfəsində, eləcə də bu ölkədə keçiriləcək yürüş və mitinqlərdə əsas mövzulardan biri olmasını istəyib.
4369632
