داعش نے 21 عیسائیوں کو اغوا کرلیا
ایکنا نیوز- شفقنا-دہشت گرد گروہ داعش نے شام میں اور ترکی کے نزدیک 21 عیسائیوں کو اغوا کرلیا ۔ شام کی سرکاری نیوز ایجنسی سانا کی رپورٹ کے مطابق تکفیری دہشت گردوں نے ترکی کی سرحد کے قریب ایک علاقے میں ھانا جالوف نامی پادری سمیت دیگر 20 عیسائیوں کو اغوا کرلیا۔ ایک اور خبر یہ ہے کہ ترکی کی سرحد کے قریب واقع شمالی شام کے شہر کوبانی یا عین العرب پر قبضےکے لئے سلفی وہابی داعش دہشت گردوں اور مقامی سنی کرد ملیشیا کے درمیان شدید لڑائی جارہی ہے۔ داعش دہشت گرد کوبانی پر قبضہ کرنا چاہتےہیں۔ رپورٹ کے مطابق داعش دہشت گرد ترکی اور شام کی سرحد پر واقع شام کے سنی کردوں کے سب سے بڑے شہر ’’کوبانی‘‘ میں داخل ہوگئے ہیں اور شہر کی گلیوں میں کرد ملیشیا کے مسلح افراد سے لڑائی میں مصروف ہیں، لڑائی میں داعش کی جانب سے بھاری ہتھیاروں کا استعمال کیا جارہا ہے۔ دوسری جانب امریکی قیادت میں اتحادی ممالک کے طیاروں نے بھی داعش کو نشانہ بنایا ہے تاہم فضائی حملے کارگر ثابت نہیں ہورہے۔ داعش کے شہر میں داخل ہونے سے قبل ہی ایک لاکھ سے زائد افراد نے شہر خالی کردیا ہے تاہم اب بھی ہزاروں افراد قصبے میں موجود ہیں جو داعش کےگھیراؤ کی وجہ سے نکل نہیں پائے۔ دونوں اطراف سے بھاری ہتھیاروں کے استعمال کی وجہ سے قصبے میں بڑے پیمانے پر بے گناہ انسانی جانوں کے ضیاع کا خدشہ ظاہر کیا جارہا ہے۔
