لاہور سے لشکر جھنگوی کے 6دہشت گرد گرفتا ر، بھاری مقدار میں بارودی مواد، ڈیٹونیٹراور اسلحہ برآمد

بین الاقوامی گروپ: گرفتار دہشت گردوں سے بھاری مقدار میں بارودی مواد، ڈیٹونیٹر، اسلحہ اور دہشت گردی کی کارروائیوں میں استعمال ہونے والا دیگر سامان بھی برآمد ہوا ہے۔

ایکنانیوز- ڈیلی پاکستان- محکمہ انسداد دہشت گردی (سی ٹی ڈی) نے پنجاب کے دارالحکومت لاہور کے دو مختلف علاقوں میں کارروائی کرتے ہوئے کالعدم لشکر جھنگوی کے چھ مبینہ دہشت گردوں کو گرفتار کرلیا ہے۔
نجی ٹی وی کے مطابق سی ٹی ڈی نے کارروائی لاہور میں دہشت گردوں کی موجودگی کی اطلاع پر کی جس کے نتیجے میں عمر ساجد جھنگوی، ہدایت اللہ اور محمد صادق کو کالج روڈ سے جبکہ انعام الحق، عطاءاللہ اور محمد یاسین کو بیدیاں روڈ سے گرفتار کیا گیا۔گرفتار ہونے والے دہشت گردوں کا تعلق کالعدم تنظیم لشکر جھنگوی سے بتایا جارہا ہے۔عمر ساجد جھنگوی احمد پور سیال ضلع جھنگ، محمد صادق لیاقت پور ضلع رحیم یار خان جبکہ ہدایت اللہ، انعام الحق، عطاءاللہ اور محمد یاسین لاہور کے رہائشی ہیں۔گرفتار دہشت گردوں سے بھاری مقدار میں بارودی مواد، ڈیٹونیٹر، اسلحہ اور دہشت گردی کی کارروائیوں میں استعمال ہونے والا دیگر سامان بھی برآمد ہوا ہے۔گرفتار افراد کے خلاف دہشت گردی کی دفعات کے تحت مقدمات درج کرلیے گئے ہیں۔
308760