ہالی ووڈ ایکٹر کی قرآن سے دلچسپی

ایکنا: امریکی اداکار اور کئی آسکر ایوارڈ جیتنے والے ویل اسمتھ نے قرآن کریم سے اپنی دلبستگی کی تفصیلات کا انکشاف کیا ہے۔

ایکنا کے مطابق، USA Today کے حوالے سے ویل اسمتھ نے بتایا کہ انہوں نے قرآن کریم کو مکمل طور پر پڑھا ہے اور یہ عمل انہوں نے اپنی زندگی کے ایک روحانی سفر کے دوران کیا۔

انہوں نے میڈیا شخصیت عمرو ادیب کے پوڈکاسٹ "بگ ٹائم" میں انٹرویو دیتے ہوئے کہا:

"میں ایک مشکل دور سے گزر رہا تھا اور میں نے اپنے اندر جھانکنا شروع کیا۔ میں نے تمام آسمانی کتابیں پڑھنا شروع کیں اور رمضان کے مہینے میں قرآن پڑھا۔ یہ میرے روحانیت کی تلاش کا ایک خاص مرحلہ تھا۔"

انہوں نے مزید کہا:

"قرآن کریم بہت سادہ ہے اور اس میں موجود باتیں نہایت واضح ہیں۔ اسے پڑھنے سے ہر طرح کی غلط فہمی دور ہو جاتی ہے۔"

جینیفر گروٹ (Jennifer Grout) امریکی گلوکارہ جینیفر گروٹ، جو شو "Arabs Got Talent" سے مشہور ہوئیں، اپنی عربی میں قرآن کریم کی تلاوت کی مہارت سے ناظرین کو حیران کر چکی ہیں، حالانکہ وہ عربی النسل نہیں ہیں۔

گروٹ نے کہا کہ قرآن کی تلاوت نے انہیں عربی زبان اور ثقافت کی گہرائی کو سمجھنے میں مدد دی۔ انہوں نے قرآن سیکھنے کے تجربے سے اپنی محبت کا اظہار کیا اور کہا کہ قرآن کا لہجہ اور آہنگ انہیں اسلامی روحانیت کے قریب لے آیا، اور اس نے انہیں اسلام اور عربی ثقافت کے بارے میں مزید جاننے کی طرف راغب کیا۔

ماہرشالا علی (Mahershala Ali) ماہرشالا علی، امریکی اداکار جنہوں نے جوانی میں اسلام قبول کیا، ان نمایاں شخصیات میں شامل ہیں جنہوں نے قرآن کریم سے اپنے گہرے تعلق کا اظہار کیا ہے۔

انہوں نے مختلف انٹرویوز، بالخصوص "دی ٹونائٹ شو ود جمی فالن" میں کہا کہ قرآن کریم نے ان کے روحانی ایمان کی تشکیل میں اہم کردار ادا کیا اور انہیں اللہ سے قریب تر کر دیا۔ انہوں نے کہا:

"قرآن کی تعلیمات نے میری ذاتی اور پیشہ ورانہ زندگی پر مثبت اثر ڈالا ہے۔ یہ میرے لیے اخلاقی رہنمائی کا ذریعہ ہے جس سے مجھے زندگی کی مشکلات سے نمٹنے اور اندرونی سکون حاصل کرنے میں مدد ملی۔"

مائیک ٹائیسن (Mike Tyson) سابق عالمی باکسنگ چیمپئن مائیک ٹائیسن، جنہوں نے 1990 کی دہائی میں اسلام قبول کیا، کئی انٹرویوز میں قرآن کریم کے اثرات پر بات کر چکے ہیں۔

انہوں نے کہا کہ قرآن نے انہیں اندرونی سکون عطا کیا، خاص طور پر ان کی زندگی کے ان برسوں کے بعد جب وہ تشدد اور ذہنی خلفشار کا شکار رہے۔ ان کا کہنا تھا:

"میں اپنی زندگی کا تصور قرآن کے بغیر نہیں کر سکتا۔ قرآن نے مجھے اپنی ذات میں تبدیلی لانے اور ایک مضبوط روحانی راستے پر چلنے کی تحریک دی۔ یہ میرے لیے ذہنی سکون اور روحانی الہام کا بڑا ذریعہ ہے۔"

جینٹ جیکسن (Janet Jackson) مشہور گلوکارہ جینٹ جیکسن نے ایک انٹرویو میں، جو انہوں نے میگزین "ووگ" کو دیا، اسلام سے اپنے تعلق اور اس کے اثرات کے بارے میں گفتگو کی۔ بعد میں انہوں نے اسلام قبول کر لیا اور کہا کہ قرآن کریم نے ان کے روحانی سفر کی سمت بدل دی۔

انہوں نے کہا:

"جب میں قرآن پڑھتی ہوں تو مجھے اندرونی سکون محسوس ہوتا ہے۔ اس کے پیغامات نے میرے امن اور بردباری کے شعور کو گہرا کر دیا ہے۔" انہوں نے مزید کہا کہ قرآن سے ان کی دلچسپی اس بات کی علامت ہے کہ کس طرح فن و ثقافت لوگوں کے روحانی عقائد پر گہرا اثر ڈال سکتے ہیں۔/

4280862