عراق میں پروفیشنل قومی قرآنی مقابلوں کے امتحانات کا آغاز
عراقی ذرائع کے مطابق، مرکز نے پیر، 21 جولائی سے اپنے مرکزی دفتر کے ثقلین ہال میں عراق کے تمام صوبوں سے موصول ہونے والی قراء کی ریکارڈ شدہ تلاوتوں کی سماعت اور جانچ کا عمل شروع کر دیا ہے۔ اس مرحلے کا مقصد تلاوتوں کا جائزہ لے کر بہترین قراء کا انتخاب کرنا ہے، تاکہ وہ 16ویں قومی ممتاز قرآنی مقابلوں میں شرکت کر سکیں۔
مرکز کے شعبۂ اطلاعات کے مطابق، تلاوتوں کی سماعت رافع العامری، ڈائریکٹر قومی مرکز برائے علومِ قرآن، کی نگرانی میں کی جا رہی ہے، جبکہ ان کا جائزہ ایک خصوصی ججنگ کمیٹی لے رہی ہے جس کی سربراہی شیخ ایاد الکعبی کر رہے ہیں۔
جیوری کمیٹی میں سامی الغراوی (تجوید کے جج)، صباح السرای (لحن کے جج)، علی عبدالستار الخفاجی اور فرحان الارکوازی (وقف و ابتدا کے ججز) جبکہ علی حسن (صوت کے جج) بھی شامل ہیں۔
ابتدائی امتحانات میں ہر صوبے سے کامیاب ہونے والے ممتاز امیدوار اپنے اپنے صوبے کی نمائندگی کرتے ہوئے آئندہ منعقد ہونے والے 16ویں قومی حفظ و قراءتِ قرآن مقابلوں میں حصہ لیں گے، جن کا انعقاد قومی مرکز برائے علومِ قرآن کرے گا۔
ان مقابلوں کا بنیادی مقصد عراق کے بہترین قراء اور حفاظِ قرآن کا انتخاب کرنا ہے، تاکہ انہیں بین الاقوامی قرآنی مقابلوں میں ملک کی نمائندگی کے لیے بھیجا جا سکے۔ گزشتہ سال ان مقابلوں کا 15واں ایڈیشن "عراق کی نمائندگی؛ سب کے لیے باعثِ فخر" کے عنوان سے منعقد کیا گیا تھا۔/
4365254
