Liviya parlamentinin fələstinlilərin Qəzzadan köçürülməsinə qəti etirazı
“İQNA”-nın “əl-Aləm” telekanalına istinadən verdiyi xəbərə görə, parlamentin Xarici Əlaqələr Komitəsi bəyanatda vurğulayıb:
“Biz Liviyanın adından, humanitar və ya təhlükəsizlik adı altında Fələstin məsələsini aradan qaldırmaq məqsədilə hazırlanan istənilən şübhəli planlarda istifadə olunmasını qəti şəkildə rədd edirik.”
Bu reaksiya İsrailin 12-ci televiziya kanalının yayımladığı bir reportajdan sonra verilib. Həmin reportajda iddia olunurdu ki, İsrailin “Mossad” kəşfiyyat xidmətinin rəhbəri Davud Barnea yaxın günlərdə Vaşinqtonda ABŞ-ın Yaxın Şərq üzrə xüsusi nümayəndəsi Stiv Vitkoffla görüşüb və ondan Liviya, Efiopiya və İndoneziya kimi ölkələrin Qəzzadan olan yüz minlərlə fələstinli qaçqını qəbul etməyə razı salınmasını istəyib.
Məlumata əsasən, İsrail bu ölkələrə bəzi güzəştlər və təşviqlər təklif etməklə onları fələstinliləri yerləşdirməyə razı salmağa çalışır.
Liviya parlamentinin komitəsi bu hesabatla bağlı ciddi narahatlıq ifadə edərək, bunu işğalçı sionist rejimin — xüsusilə Mossad vasitəsilə və ABŞ da daxil olmaqla bəzi beynəlxalq oyunçuların iştirakı ilə — Fələstin xalqına qeyri-qanuni variantları zorla qəbul etdirmək üçün göstərdiyi koordinasiyalı səylərin göstəricisi kimi qiymətləndirib.
Komitə, Liviya dövlətinin Fələstin xalqının hüquqlarını pozan istənilən məcburi köçürmə və ya alternativ həll yollarına qarşı olan prinsipial mövqeyini vurğulayıb və Liviya hökumətini və Xarici İşlər Nazirliyini bu ssenarini rədd etdiklərini açıq və rəsmi şəkildə bəyan etməyə çağırıb.
Parlament həmçinin İsrail rejiminin Qəzzaya qarşı blokada, aclıq siyasəti və humanitar yardımların qarşısını almaq kimi addımlarını pisləyib və bu addımları beynəlxalq humanitar hüququn və Cenevrə konvensiyalarının açıq şəkildə pozulması kimi qiymətləndirib.
Bəyanatın digər bir hissəsində isə dünya ictimaiyyətinə müraciət edilərək, fələstinlilərin köçürülməsi və məskunlaşdırılması planlarını dəstəkləmək əvəzinə, İsrailin təcavüzünün dayandırılması məsuliyyətini öz üzərinə götürməsi tələb olunub.
Bu reaksiya İsrailin müharibə naziri Yisrael Katz-ın cənub Rəfah bölgəsində “insani şəhər” qurulması planını açıqlamasından sonra verilib. Plana əsasən, burada çadırlardan ibarət müvəqqəti şəhər yaradılacaq və təhlükəsizlik yoxlamalarından keçmiş 600 min fələstinli ilkin mərhələdə ora köçürüləcək.
Bu plan insan haqları təşkilatları və region ölkələrinin bəziləri tərəfindən geniş şəkildə mənfi reaksiya ilə qarşılanıb.
2023-cü il oktyabrın 7-də İsrail ordusunun Qəzzaya hücumuna başladığı gündən bu günə qədər 201 mindən çox fələstinli şəhid olub və ya yaralanıb; onların əksəriyyətini qadınlar və uşaqlar təşkil edir.
Bundan əlavə, 9 mindən çox insan itkin düşüb və yüz minlərlə insan isə didərgin düşüb.
Beynəlxalq təşkilatlar bu addımları soyqırımı və hərbi cinayətlər kimi qiymətləndiriblər.
4295903
