Şotlandiyanın Baş naziri Qəzzaya qarşı müharibəni soyqırım adlandırıb
“İQNA”-nın “Qüds Press” xəbər agentliyinə istinadən verdiyi xəbərə görə, Şotlandiyanın Baş naziri Con Svinni Qəzza hadisələrinə sərt reaksiya verərək dedi: “Aydın şəkildə görünür ki, Fələstində bir soyqırım baş verir və bunu inkar etmək mümkün deyil.”
Svinni Edinburqda fələstinli tərəfdarlarının etirazları ilə dəfələrlə üzləşdiyi bir vaxtda jurnalistlərə açıqlamasında deyib: “Mən soyqırım xarakterli dəhşətli cinayətlərlə bağlı hesabatlar görmüşəm. Bu fikrimi açıq şəkildə bildirmişəm. Hər kəs eşitməsə belə, bu mənim həqiqi hisslərimdir.”
Bu açıqlamalar, İsrail rejiminin Qəzzaya hərbi təcavüzü nəticəsində 60 mindən çox fələstinlinin öldürüldüyü təxmin edilən bir dövrdə verilib; bu rəqəm Şotlandiyanın orta ölçülü şəhərlərindən biri olan Perth və ya Inverness-in tam əhalisindən çoxdur.
Son aylarda Britaniyada yerli hakimiyyətlər, silah sənayesi ilə əməkdaşlığa son qoymaları üçün ictimaiyyətin ciddi təzyiqləri ilə üzləşiblər. Şotlandiya əvvəllər də Londona qarşı Fələstin mövzusunda fərqli mövqe sərgiləmişdi. 2014-cü ildə o dövrün Baş naziri Nikola Stercen İsrailə hərbi avadanlıq satan şirkətlərin boykot edilməsini tələb etmişdi. İndi isə Con Svinni Qəzzada baş verənləri açıq şəkildə “soyqırım” adlandırmaqla, Şotlandiya yerli hökuməti ilə Britaniya hökuməti arasındakı fikir ayrılığını yenidən gündəmə gətirib.
Şotlandiyanın Baş naziri, hökumətin İsrailə silah ixrac edən şirkətləri maliyyələşdirməsi ilə bağlı suala da belə cavab verib: “Heç bir tərəddüd etmədən bu məsələ ilə bağlı lazım olan bütün araşdırmaları aparacağıq.”
4298016
