Yeni Zelandiyanın paytaxtında bir məscidə bomba qoyulacağı ilə bağlı təhdiddən sonra təhlükəsizlik tədbirləri artırılıb
“İQNA”-nın “Stuff” saytına istinadən verdiyi xəbərə görə, bomba qoyulacağına dair təhdid Velinqtondakı Kilbirni məscidi və İslam Mərkəzinin fəaliyyətini dayandırmasına səbəb olub.
Polis hazırda bu təhdidlə bağlı araşdırma aparır. Rəsmilərin bildirdiyinə görə, bu hədə dünən cümə axşamı onlayn platformalardan biri vasitəsilə göndərilib. Təhdiddə Kilbirni məscidinin dəqiq ünvanı da qeyd olunub.
Velinqton İslam Mərkəzi bu məlumatı təsdiqləyərək bildirib ki, şəhərin digər məscid və İslam mərkəzləri də oxşar təhdidlər alıblar.
Yeni Zelandiya İslam Assosiasiyaları Federasiyasının (FIANZ) məlumatına görə, bu məscid mütəmadi olaraq hədəfə alınır. FIANZ Şurasının sədri Əbdürrəzzaq Herald qəzetinə açıqlamasında polisin reaksiyasının diqqətəlayiq olduğunu vurğulayıb.
Şəhər Şurasının üzvü Nurəddin Əbdürrəhman isə FIANZ-dan bu təhdidlə bağlı e-poçt aldığını bildirib. Onun sözlərinə görə, rəsmilər lazımi ehtiyat tədbirlərini görürlər.
Polis Herald qəzetinə açıqlamasında cəmiyyət üçün bilinen və dərhal təhlükə olmadığını bildirib.
Yeni Zelandiya islamofobiya və məscidlərə yönələn hücumlarla bağlı ciddi çətinliklərlə üzləşib. 2019-cu ilin mart ayında Kraystçörçdəki Ən-Nur məscidi və Linvud İslam Mərkəzində baş verən silahlı hücum zamanı 51 nəfər namaz qılan şəxs qətlə yetirilmişdi.
Sonradan yaradılan Kral Komissiyasının araşdırmaları göstərib ki, Yeni Zelandiyadakı müsəlmanlar mütəmadi olaraq ayrı-seçkilik, təhdid xarakterli ifadələr və qarşılaşdıqları nifrət hadisələrinin orqanlara bildirilməməsi kimi problemlərlə üzləşirlər.
4312703
