İrlandiyada işğalçı rejimin keçmiş prezidentinin adının parkdan silinməsi
“İQNA”-nın “Əl-Məyadin”ə istinadən verdiyi məlumata görə, İsrail qəzeti Yediot Aharonot yazıb ki, Dublinin Şəhər Şurası bu həftə sionist rejimin altıncı prezidenti Hayim Hersoqun adının Rattqar bölgəsində yerləşən parkdan silinməsi barədə qərar qəbul edib. Bu qərar Fələstin tərəfdarı qrupların təzyiqi nəticəsində verilib.
Parkın adının dəyişdirilməsi təklifi ilk dəfə ötən ilin dekabrında Qəzza müharibəsindən sonra Şəhər Şurasının Cənub-Şərq bölgəsi komitəsində irəli sürülmüş və nəhayət, ötən bazar ertəsi çoxluq səsi ilə təsdiqlənmişdir.
Fələstin tərəfdarı fəallar parkın adının “Azad Fələstin Parkı” və ya sionist rejimin ordusunun gülləsi ilə şəhid edilmiş fələstinli uşaq Hind Rəcəb’in adı ilə dəyişdirilməsinə çalışırlar.
Bu qərar, Qəzza müharibəsinin 2023-cü ildə başlamasından bəri Dublində bir çox etiraz aksiyası keçirən və UEFA, FIFA və Beynəlxalq Velosiped İttifaqı kimi beynəlxalq idman təşkilatlarını İsraili boykot etməyə çağıran İsrail əleyhdarı təşkilatların davamlı təzyiqləri altında qəbul edilib.
Bu kontekstdə, Yediot Aharonot qəzeti yazıb ki, bu qərar İrlandiyadakı İsrail tərəfdarı qrupların, o cümlədən İrlandiyanın sabiq ədliyyə naziri Alan Şatterin sərt tənqidi ilə qarşılanıb.
Sözügedən park İrlandiyadakı yeganə yəhudi ibtidai və orta məktəbinə yaxın bir ərazidə yerləşir. Park 1985-ci ildə “Orwell Quay Parkı” adı ilə açılıb və bir on il sonra sionist rejimin keçmiş prezidenti Hayim Hersoq və onun atası, İrlandiyanın baş ravvini və İsrailin ilk baş ravvini olan İshaq Hersoqun şərəfinə “Hersoq Parkı” adlandırılıb.
İşğalçı rejimin Prezidentlik Ofisi İrlandiyanın bu addımına reaksiyada narahatlığını ifadə edərək bildirib: bu qərar Hersoqun mirasına və onun İrlandiya ilə tarixi əlaqələrinə zərər vurur.
Bəyanatda deyilir: parkın adının ona verilməsi təxminən otuz il əvvəl onun mirasına və İrlandiya xalqı ilə yəhudilər arasında dərin dostluğa ehtiramın ifadəsi idi, lakin təəssüf ki, bu münasibətlər son illərdə pisləşib. Əgər Hersoqun adı silinsə, bu, təəssüf doğuran və utancverici bir addım olacaq.
4319897
