Amerikalı siyasətçinin işğal olunmuş ərazilərdə xristianlara qarşı təzyiqləri etiraf etməsi
“İQNA”‑nın “Arabi21” portalına istinadən verdiyi məlumata görə, ABŞ Konqresinin sabiq üzvü Marjori Teylor Qrin bildirib ki, sionist işğalçılar Qərb Sahilinin cənubunda yerləşən Betləhm şəhərində fələstinli xristianlara təzyiq edir və bu vəziyyətin dərhal dayandırılması lazımdır.
Respublikaçı Partiyanın tanınmış liderlərindən sayılan Qrin bazar günü X platformasında paylaşım edərək Betləhmin meri Mahir Qənavati ilə görüşdüyünü açıqlayıb.
O deyib ki, görüşdə Betləhmdə, Qərb Sahilində və Qəzza zolağında xristianların üzləşdiyi təzyiqlər barədə danışılıb. Qrin əlavə edib: “Qəzzada işğalçılar tərəfindən həyata keçirilən soyqırım zamanı xristianlar da öldürüldü və kilsələr dağıdıldı.”
Onun sözlərinə görə, Betləhmin meri ona bildirib ki, xristianlar sadəcə qanuni sahib olduqları evlərində sakit yaşamaq istəyirlər, lakin israilli məskunlaşanlar onların evlərini ələ keçirməyə davam edirlər.
Qrin əlavə edib: “Betləhmdə hazırda 139 nəzarət‑buraxılış məntəqəsi var. Şəhərin sahəsi əvvəllər 41 kvadrat mil (106 km²) idi, lakin indi 7 kvadrat milə (18 km²) qədər azaldılıb.”
O, Betləhmin Həzrət İsanın (ə) doğulduğu şəhər olduğunu xatırladaraq bildirib: “Amerikalı xristianların çoxu oradakı xristianların nə qədər təzyiq altında olduğunu bilmir, amma bilməlidirlər və səslərini qaldırmalıdırlar.”
4334875
