Səudiyyə Ərəbistanı Ramazan ayının ümrə ziyarətçilərini qarşılamağa hazırlaşır
“İQNA”-nın “Qahirə 24”-ə istinadən verdiyi xəbərə görə, Məkkə valisinin müavini Səud bin Məşəl bin Əbdüləziz çərşənbə axşamı Məscidül-Həramı və onun obyektlərini ziyarət edərək Ramazan ayında namazqılan və ziyarətçiləri qəbul etmək üçün əməliyyat və xidmət hazırlıqlarını qiymətləndirib.
O, izdihamın idarə olunması, xidmətlərin artırılması və obyektlərin hazır vəziyyətə gətirilməsi kimi mexanizmləri əhatə edən əməliyyat planları barədə hesabatları dinləyib və xüsusilə pik saatlarda Məscidül-Həram ziyarətçilərinin rahatlığı, təhlükəsizliyi və hərəkətin axıcılığı ilə bağlı tədbirlərlə tanış olub.
Məkkə valisinin müavini əməliyyat sistemini dəstəkləyən inkişaf layihələri və ağıllı xidmətlər, xüsusilə yaşlılar və əlillər üçün nəzərdə tutulmuş elektrik nəqliyyat vasitələri barədə də məlumat alıb. Bu vasitələr ümrə ziyarətçilərinin hərəkətini asanlaşdırır və çətinlikləri azaldır.
O həmçinin çoxdilli bələdçi və istiqamətləndirmə xidmətləri, interaktiv xəritə və rəqəmsal platforma barədə hesabatlar dinləyib. Bu platforma ziyarətçilərə marşrutlarını əvvəlcədən planlaşdırmağa, xidmət məntəqələri, giriş-çıxışlar və ən az tıxac olan yollar barədə məlumat almağa imkan verir.
Bundan əlavə, o, bələdçi tətbiqlərindən istifadəyə dəstək verən pulsuz “Wi-Fi” xidmətləri və bir neçə dildə virtual bələdçi xidmətləri barədə də məlumatlandırılıb.
Bu arada Səudiyyə Ərəbistanının Rabitə, Kosmos və Texnologiya Təşkilatı xidmətlərin davamlılığını və etibarlılığını təmin etmək üçün rəqəmsal infrastrukturun gücləndirilməsinə yönəlmiş əməliyyat planlarının hazır olduğunu açıqlayıb.
Mədinədə isə vali Salman bin Sultan bin Əbdüləziz təhlükəsizlik rəhbərliyi ilə dövlət və xidmət qurumları arasında koordinasiyanın əhəmiyyətini vurğulayaraq Məscidün-Nəbi sakinləri və ziyarətçilərinin təhlükəsizliyi və rahatlığının təmin edilməsinin prioritet olduğunu bildirib. O, Allahın qonaqlarına xidmət üçün bütün imkanların səfərbər edilməsinin vacibliyini qeyd edib.
Vali həmçinin Mədinə polisinin rəisi general-mayor Yusif bin Abdullah əz-Zəhranini qəbul edib və görüşdə Ramazan ayında Məscidün-Nəbi ziyarətçiləri üçün təhlükəsiz və rahat mühitin təmin edilməsinə yönəlmiş təhlükəsizlik və nəqliyyat tədbirləri müzakirə olunub.
Eyni istiqamətdə “Şəhər avtobusları” layihəsi namazqılan və ziyarətçilərə xidmət göstərmək, onların Məscidün-Nəbiyə və Quba məscidinə rahat çatmasını təmin etmək üçün 8 marşrut üzrə şatıl nəqliyyat xidmətinin işə düşdüyünü elan edib.
4335188
