Malayziyalı mütəfəkkir: Ayətullah Xamenei İslam dünyasının müqavimət və kərəmət səsi idi
“İQNA”-nın “Kuala Lumpur”dakı İran Mədəniyyət Müşavirliyinə istinadən verdiyi xəbərə görə, Malayziya İslam Təşkilatları Şurasının sədri Məhəmməd Əzmi Əbdülhəmid “Ayətullah Seyid Əli Xamenei haqqında düşüncələr: Birlik rəhbəri, Qüds müdafiəçisi və Ramazan şəhidinin irsi” adlı yazısında onun İslam dünyasındakı intellektual və siyasi mövqeyini təhlil edib.
O, qeyd edir ki, Ayətullah Xamenei yalnız siyasi lider deyildi; o, İslam ümmətinin kərəmətinə, inancına və müqavimətinə sadiqliyin simvolu idi.
Əbdülhəmidin fikrincə, Ayətullah Xamenei onilliklər boyunca müsəlmanlara xatırladırdı ki, iman cəsarətlə müşayiət olunmalıdır və xarici təzyiqlər qarşısında suverenlik və ədaləti müdafiə etmək zəruridir.
O, şəhid İran rəhbərinin elmi-mənəvi irsinə toxunaraq bildirir ki, Ayətullah Xamenei dərin İslami elmi ənənədən gəlirdi, lakin eyni zamanda inanırdı ki, din alimi yalnız elmi dairələrdə qalmamalı, məzlumların yanında dayanmalı və ədalətsizliyə qarşı söz deməlidir.
Malayziyalı düşünür yazının başqa bir hissəsində vurğulayır ki, İslam dünyasının birliyi Ayətullah Xameneinin düşüncəsinin əsas sütunlarından biri idi. O, daim xəbərdarlıq edirdi ki, müsəlmanlar arasındakı ixtilaflar ümməti zəiflədir və hegemon güclərin təfriqə yaratmasına şərait yaradır.
Onun baxışına görə, birlik sadəcə şüar deyil, İslam dünyası üçün strateji və əxlaqi zərurətdir.
Əbdülhəmid həmçinin Qüdsün müdafiəsi və Fələstin xalqına dəstəyi Ayətullah Xameneinin düşüncəsinin ən mühüm dayaqlarından biri hesab edir və vurğulayır ki, o, Fələstin məsələsini yalnız siyasi münaqişə deyil, bütün müsəlmanlar və hətta dünya ədalətsevərləri üçün əxlaqi məsuliyyət kimi görürdü.
Yazıda həmçinin qeyd olunur ki, Ayətullah Xamenei hegemon güclərin hökmranlığına qarşı müqaviməti vacib sayırdı və dəfələrlə xəbərdarlıq edirdi ki, böyük güclər iqtisadi təzyiq, siyasi müdaxilə və hərbi təcavüz vasitəsilə zəif xalqlara öz iradələrini qəbul etdirməyə çalışırlar.
Əbdülhəmid vurğulayır ki, İslam dünyası bu gün də müharibə, işğal və siyasi qeyri‑stabil kimi böyük çətinliklərlə üzləşir və belə bir şəraitdə Ayətullah Xameneinin irəli sürdüyü birlik, ədalət və kərəmət mesajları öz aktuallığını qorumaqdadır.
Sonda o bildirir ki, liderlərin xatirəsini yaşatmaq yalnız onları yad etməklə deyil, ədalət, birlik və zülmə qarşı dayanmaq kimi prinsipləri davam etdirməklə mümkündür.
4340457
