Ərəb xarici işlər nazirlərinin bölgə münaqişələrinin həlli üçün diplomatiyaya qayıdışa çağırışı
“İQNA”-nın “əl-Aləmdən” verdiyi xəbərə görə, Qətər Xarici İşlər Nazirliyi bəyan edib ki, Qətərin baş naziri və xarici işlər naziri Məhəmməd bin Əbdürrəhman bin Casim Al Sani Səudiyyə Ərəbistanının xarici işlər naziri Feysəl bin Fərhan Al Səud, Küveytin xarici işlər naziri Cərah Cabir əl-Əhməd əs-Sabah, BƏƏ-nin xarici işlər naziri Abdullah bin Zayed Al Nəhyən və Misirin xarici işlər naziri Bədr Əbdülati ilə ayrı-ayrı telefon danışıqları aparıb və regiondakı son hadisələri müzakirə edib.
Nazirlər bu danışıqlarda bölgədə hərbi qarşıdurmaların artması və bunun regional və beynəlxalq təhlükəsizlik üçün təhlükəli nəticələrini nəzərdən keçirib, fikir ayrılıqlarının sülh yolu ilə həllinin vacibliyini vurğulayıblar.
Bəyanata əsasən, danışıqlarda gərginlik yaradan bütün addımların dərhal dayandırılması, dialoq masasına qayıdılması, böhranın idarə olunması üçün sağlam düşüncə və uzaqgörənlik yolunun seçilməsi, həmçinin koordinasiyanın gücləndirilməsi və birgə səylərin artırılması zəruri hesab edilib.
Ərəb xarici işlər nazirləri qlobal enerji təhlükəsizliyinin təmin olunması, gəmiçiliyin azadlığı və ətraf mühitin qorunması üçün dialoq və birgə səylərin vacibliyini vurğulayıblar.
Qətər baş naziri bu danışıqlarda bildirib ki, ölkəsi həmişə regional münaqişələrdən uzaq durmağa və İranla beynəlxalq ictimaiyyət arasında dialoqun asanlaşdırılmasında rol oynamağa çalışıb.
O həmçinin enerji obyektlərinə hücumları beynəlxalq hüququn açıq şəkildə pozulması adlandırıb və belə addımların qlobal enerji təhlükəsizliyi, ətraf mühit və gəmiçiliyin azadlığı üçün ciddi təhdid olduğunu bildirib.
Danışıqlarda gərginliyin azaldılması, hücumların nəticələrinin qarşısının alınması və sabitliyin bərpası zərurəti vurğulanıb.
Bununla yanaşı, Qətər Xarici İşlər Nazirliyi başqa bir bəyanatda bildirib ki, Al Sani Avropa İttifaqının xarici siyasət üzrə ali nümayəndəsi Kaya Kallas ilə də telefon danışığı aparıb.
Kallas söhbət zamanı gərginliyin azaldılması, dialoqa qayıdılması və böhranın dərinləşməsinin qarşısını almaq üçün diplomatik vasitələrdən istifadə edilməsinin vacibliyini qeyd edib.
4342488
