Əlcəzairdə bir neçə məscid və Quran məktəbi açıldı
“İQNA”-nın “Əlcəzair” radiosuna istinadən verdiyi xəbərə görə, Əlcəzairin dini işlər və vəqflər naziri Yusif Bəlməhdi Mədiyə şəhərində bir neçə məscid və Quran məktəbini istifadəyə verib.
Bəlməhdi səfərinə Ben Şikau bölgəsində yerləşən və 1200 nəfər namazqılana ev sahibliyi edə bilən “Qüds” məscidinin açılışı ilə başlayıb. Daha sonra isə Əyn Busiifdə 5000-dən çox namazqılana xidmət göstərə bilən “Ömər ibn Xəttab” məscidinin açılışı baş tutub.
Nazir həmçinin iki Quran məktəbini də istifadəyə verib. Birincisi əl-Umariyyə bölgəsində yerləşir və dərs otaqları, tələbə yataqxanası, kafeterya və konfrans zalından ibarətdir. İkincisi isə Uləd İbrahim bölgəsində yerləşir və Quran təhsili və qiraət üçün dərs otaqları, kitabxana və ibadət otağından ibarətdir.
Bu məktəb hazırda təxminən 470 şagirdə (qız və oğlan) xidmət göstərir. Bundan əlavə, savadlandırma kurslarına qeydiyyatdan keçmiş 114 nəfər də var.
Nazir 2800 nəfərlik məscid tikintisi layihəsinə də baxış keçirib. Bu məscid Quran tədrisi və qiraəti üçün bir neçə sinif otağı ilə təchiz ediləcək. Layihənin 30 faizinin tamamlandığı bildirilib.
Dini işlər və vəqflər naziri səfəri zamanı məsul şəxslərdən yeni açılan Quran məktəblərində və hazırda fəaliyyət göstərən məktəblərdə Quran öyrənmək istəyənlərin qeydiyyatını asanlaşdırmağı xahiş edib ki, insanlar bu xidmətlərdən faydalana bilsinlər.
Bəlməhdi əl-Umariyyə Quran məktəbində sektor rəhbərləri ilə görüşündə Quran məktəblərinin və mədəniyyət məkanlarının Əlcəzairin kimliyinin Fransa müstəmləkə dövründə və bu günədək qorunmasında oynadığı rolu vurğulayıb.
O, bu məktəbləri maarifləndirici məkanlar adlandıraraq bildirib ki, onlar ölkənin dini irsinin qorunmasında və milli kimliyin formalaşmasında mühüm rol oynayıb. Nazir əlavə edib ki, bu məktəblər həmçinin cəmiyyətin sosial xəstəliklərdən qorunmasında və sülh, həmrəylik mesajının yayılmasında əhəmiyyətli rol oynayır.
4345934
