Antalyada Qəzza mövzusunda 8 ərəb və islam ölkəsinin toplantısı
“İQNA”-nın “Rusiya əl-Yəvm”ə istinadən verdiyi xəbərə görə, mənbələr deyiblər ki, Türkiyənin xarici işlər naziri Hakan Fidan bu gün, şənbə günü, Antaliyadakı diplomatik forumun kənarında Qəzza ilə bağlı nazirlər səviyyəsində görüş keçirəcək.
Bu iclasda BƏƏ, İndoneziya, Qətər, Misir, Pakistan, Səudiyyə Ərəbistanı və İordaniyanın nümayəndələri iştirak edəcəklər. Qeyd olunur ki, bu ölkələrin hamısı 23 sentyabrda Nyu-Yorkda ABŞ prezidenti Donald Trampla keçirilən görüşdə də iştirak etmişdilər.
Mənbələrin bildirdiyinə görə, Fidan toplantıda Fələstin məsələsinin beynəlxalq gündəmdə saxlanmasının əhəmiyyətini, dərhal daimi atəşkəsin təmin edilməsini, Qəzzanın fələstinlilər tərəfindən idarə olunmasının və təhlükəsizliyinin tez bir zamanda təmin edilməsini, həmçinin Qəzzanın bərpası üçün təcili səylərin başlanmasını vurğulayacaq.
Mənbələr əlavə ediblər ki, Fidan Qəzzada sülh planının ikinci mərhələsinə keçidin bölgədə gərginliyin azalmasına kömək edə biləcəyini qeyd edəcək və İsrailin bu prosesə mane olmaq cəhdlərinə toxunacaq.
Məlumata görə, Fidan həmçinin ABŞ və İran arasında aparılan danışıqlar, regiondakı son hadisələr və o cümlədən İsrailin Livanın bəzi bölgələrindəki müharibə və işğala son qoymaq üçün görülən səylər barədə də məsləhətləşmələr aparacaq.
4347077
