Misir Quran Radiosunda Şüəyşə ailəsinin davamçısının tilavəti yayımlanır
“İQNA”-nın "Əl-Əhram"a istinadən verdiyi məlumata görə, "İnsan" surəsinin 14-cü ayəsini ("Onların (cənnət ağaclarının) kölgələri üstlərinə düşəcək və onların meyvələri (dərilməyə) tam ram ediləcəkdir") əhatə edən bu tilavət hər gecə Misir vaxtı ilə saat 23:00-da ölkənin məşhur "İman bağlarından dəstələr" adlı proqramı vasitəsilə efirə gedir.
Görkəmli misirli qari Şeyx İbrahim Şüəyşə 1930-cu ildə Qahirənin tarixi və əsil bölgələrindən biri olan Dərb əl-Əhmər məhəlləsində dünyaya gəlib.
O, Şeyx Əbdülfəttah Şüəyşənin oğlu idi və ailəsi əslən Misirin Mənufiyyə vilayətinin Əşmun rayonunun Şəşai kəndindən idi.
Şeyx Əbdülfəttah Qahirəyə köçərək, İbrahimin doğulduğu Dərb əl-Əhmər məhəlləsində məskunlaşmışdı. İbrahim də böyük bir şeyxin oğlu kimi yüksək məqamlı qari kimi tanınırdı.
Şeyx İbrahim uşaqlıq illərində Quranı əzbərləmiş, Quran elmlərini və qiraət qaydalarını öyrənmişdi. Onun ən görkəmli müəllimlərindən biri Qahirədəki İmam Hüseyn (ə) məscidinin baş qarisi Məhəmməd Süleyman əl-Şəndəvili olmuşdur. O, həmçinin "Fuad əl-Əvvəl" musiqi institutunda ərəb musiqisini və səs məqamlarını öyrənmişdi.
Bu misirli qarinin ulduzu 1950-ci illərin əvvəllərində atasının yanında parlamağa başladı. İbrahim atasının 1962-ci ildə vəfatından sonra onun Misirdəki "Seyyidə Zeynəb" məscidindəki yerini tutdu və 1967-ci ildə Misir radiosuna qari kimi qoşuldu.
Gənc Şüəyşə atasının tilavət üslubunun ona dərindən təsir etdiyini etiraf edər və vurğulayardı ki, atası da öz növbəsində Şeyx Rəfətdən əvvəlki nəslin qarisi olan Şeyx Əhməd Nədanın üslubundan təsirlənmişdi.
Şeyx İbrahim dərin və zəngin səsi, "Vərş" rəvayəti ilə qiraəti, "vəqf və ibtida" (dayanma və başlama) qaydalarına mükəmməl bələdliyi, tilavətindəki ağırbaşlılığı və vüqarı ilə böyük rəğbət qazanmışdı.
O, atasının yolunu davam etdirərək fəsih tilavəti, güclü ifası və təcvid qaydalarına ciddi riayət etməsi ilə seçilirdi. Ondan bu gün də yayımlanan dəyərli səs yazıları qalıb.
Bu misirli qari Quranın səfiri kimi ərəb və İslam dünyasına səyahətlər etmiş, Ramazan gecələrində müxtəlif ölkələrin Quran məclislərində iştirak etmişdir.
Şeyx İbrahim Şüəyşə 9 iyun 1992-ci ildə vəfat edib.
4357206
