“İQNA”-nın "Ərəbi 21"-ə istinadla verdiyi məlumata görə, ABŞ Müdafiə Nazirliyi (Pentaqon) dini mənsubiyyət qaydalarını yeniləyərək, rəsmi olaraq tanıdığı din və məzhəblərin sayını təxminən 200-dən 31-ə endirib.

Hərbi ruhanilərə dini dəstək xidmətlərini təşkil etməkdə kömək etmək bəhanəsi ilə həyata keçirilən bu addım, "Mormon" icmasının üzvlərini hiddətləndirib. Belə ki, onlar xristianlığın bir qolu kimi siyahıya daxil edilməyiblər.

"Fox News"un məlumatına görə, ABŞ müdafiə nazirinin müavini Entoni Tatanın yaydığı daxili qeyddə bildirilir ki, nazirlik sabiq müdafiə naziri Pit Heqset tərəfindən verilən əvvəlki təlimatların icrası olaraq, təxminən 180 din və əqidəni təsdiqlənmiş siyahıdan çıxarıb.

Nazirlik bu addımın rəsmi tanınan dinləri və ya vicdan azadlığını məhdudlaşdırmaq məqsədi daşımadığını bəyan edərək əlavə edib ki, silahlı qüvvələrin üzvləri yeni 31 kateqoriyaya daxil edilməsələr belə, öz inanclarını şəxsiyyət vəsiqələrində qeyd etməyə davam edə bilərlər.

Qeyddə izah edilir ki, yeni siyahı hərbi ruhanilərə silahlı qüvvələrdəki şəxslərin dini ehtiyaclarını daha aydın şəkildə proqnozlaşdırmağa imkan verən məlumatlar təqdim edir.

Yeni siyahı azaldılsa da, İslam, İudaizm, Hinduizm, Buddizm və Sikizm kimi əsas dinləri, həmçinin Katoliklər, Baptistlər, Lüteranlar və Metodistlər kimi çoxsaylı xristian təriqətlərini və eləcə də aqnostikləri özündə ehtiva edir.

Nazirliyin izahatlarına baxmayaraq, bu qərar bir sıra müşahidəçilər və keçmiş hərbi ruhanilər tərəfindən tənqidlə qarşılanıb. Onlar hesab edirlər ki, dini qrupların sayının azaldılması hərbi qurumda dini müxtəlifliyin səviyyəsi haqqında mənfi təəssürat yarada bilər.

Mart ayında müdafiə naziri Pit Heqset bu qərarı müdafiə edərək deyib: "200-dən çox dinin tanındığı əvvəlki sistem həddindən artıq şişirdilmişdi". O, qeyd edib ki, onlardan bəziləri əslində istifadə olunmurdu və əksər hərbi qulluqçular məhdud sayda əsas dinlərə mənsub idilər.

Qeyd edək ki, daha əvvəl müstəqil kateqoriya kimi göstərilən ateizm (allahsızlıq) də ABŞ Müdafiə Nazirliyinin təsdiqlədiyi yeni təsnifat strukturunda dəyişikliyə məruz qalan və ya inteqrasiya olunan inanclar sırasındadır.

4357426