Fələstin tərəfdarı olan fəalların Londonda sionistlərin tədbirinə etirazı
“İQNA”-nın "Qardian"a istinadən verdiyi məlumata görə, Londonda gərginlik, işğal olunmuş İordan çayının qərb sahilindəki israilli yaşayış məntəqələrində əmlak və torpaq satışını təşviq etmək üçün keçirilən tədbirə ev sahibliyi edən otelin qarşısında fələstinsevərlər və Tel-Əviv tərəfdarlarının toqquşması ilə daha da şiddətlənib.
Bu proqram "Sionist rejimin böyük əmlak və daşınmaz əmlak tədbiri" adı altında keçirilib və orada sionist rejim şirkətləri İordan çayının qərb sahilindəki israilli yaşayış məntəqələrində ev və torpaq almaq imkanlarını nümayiş etdiriblər. Bu məsələ insan haqları təşkilatları və Britaniya parlamentinin üzvlərinin geniş tənqidinə səbəb olub; onlar bu proqramın qanunsuz məskunlaşma fəaliyyətini təbliğ etdiyini bildiriblər.
Sosial şəbəkələrdə yayılan görüntülərdə hər iki tərəf arasında qışqırıqlar və qarşılıqlı ittihamlarla müşayiət olunan ciddi qarşıdurma əks olunub. Britaniya polisi birbaşa toqquşmanın qarşısını almaq üçün otelin ətrafında yerləşdirilib.
Şahidlərin dediyinə görə, qarşıdurma mühiti o həddə çatıb ki, polis İsrail tərəfdarı olan iştirakçılarla şifahi mübahisələrdən sonra fələstinsevər fəalları təhlükəsizliyini təmin etmək üçün ərazidən uzaqlaşdırıb.
"Amnesty International" (Beynəlxalq Amnistiya) təşkilatı bu tədbiri pisləyərək bildirib ki, israilli yaşayış məntəqələrində torpaq və əmlak satışının təbliği beynəlxalq hüququ pozan məskunlaşma layihəsinə dəstək vermək deməkdir.
Təşkilat vurğulayıb ki, işğal olunmuş Fələstin ərazilərində tikilən yaşayış məntəqələri beynəlxalq humanitar hüququn pozulmasıdır. Həmçinin qeyd edilib ki, mülki əhalinin işğal olunmuş ərazilərə köçürülməsi və ya həmin torpaqların iqtisadi istismarı beynəlxalq qurumlar tərəfindən dəfələrlə pislənmiş işğal sisteminin bir hissəsidir.
Müxtəlif partiyalardan olan Britaniya parlamentinin üzvləri də hakimiyyəti bu tədbiri ləğv etməyə və onun keçirilməsinə mane olmağa çağırıblar. Onlar xəbərdarlıq ediblər ki, yaşayış məntəqələrində əmlak satışının təbliğinə icazə vermək, beynəlxalq hüququn sənədləşdirilmiş pozuntuları ilə bağlı fəaliyyətləri qanuniləşdirir.
4358401
