Türkiyənin tarixi məscidi 112 illik fasilədən sonra yenidən açılıb
“İQNA”-nın "yeniakit"-ə istinadən verdiyi məlumata görə, 2005-ci ildən etibarən Fondlar Baş İdarəsi tərəfindən fasiləsiz idarə olunan bu tarixi məscidin bərpa layihəsi 2025-ci ildə başa çatıb. Məscid detalların tamamlanmasından sonra ötən gün, iyunun 26-da, cümə günü Gümüşhanə vilayətinin müftisi Xeyri Ernayın imamlığı ilə qılınan cümə namazı ilə rəsmi olaraq ibadətə açılıb.
Xeyri Ernay çıxışı zamanı bildirib: "Tarixi qeydlər göstərir ki, bu məscidin təxminən min illik tarixi var. Bu tikili Səlcuqlu memarlıq ənənələrinin mühüm nümunəsi kimi qalır və öz ilkin formasının böyük bir hissəsini müvəffəqiyyətlə qoruyub saxlayıb".
Ernay məscidin öz orijinallığına xələl gəlmədən günümüzə qədər gəlib çatdığını qeyd edərək deyib: "Kvadrat plan üzərində tikilmiş bu quruluş Səlcuqlu və Danişməndli memarlığının mühüm nümayəndələrindən biri kimi mövcuddur. 1914-cü ilə qədər ibadət üçün aktiv şəkildə istifadə edilmiş, daha sonra isə müxtəlif səbəblərdən bağlanmışdır".
Gümüşhanə vilayətinin müftisi vurğulayıb ki, bərpa işləri binanın ilkin layihəsinə və tarixi bütövlüyünə uyğun şəkildə aparılıb.
"Kuçuk" məscidinin açılışının əhəmiyyətini vurğulayan Xeyri Ernay bildirib ki, bir əsrdən çox fəaliyyətsiz qalan bu məscidin xidmətə qayıtması onun yerli icma üçün ibadət yeri kimi rolunu bərpa edəcək.
O, sözlərini belə yekunlaşdırıb: "İnşallah, bundan sonra ibadət mərasimləri və gündəlik namazlar burada müntəzəm olaraq qılınacaq. İllərlə baxımsız qalan bu ibadət yerini camaat namazları ilə yenidən canlandırdıq və yerli sakinlər arasında birliyi möhkəmləndirdik. Allah bu işdə əməyi keçən hər kəsdən razı olsun".
4360611
