Şəhid liderlə vida mərasiminin beynəlxalq mediada əksi
"İQNA"nın məlumatına görə, “CNN” telekanalı, cümə günü səhər saatlarında İran İslam İnqilabının şəhid lideri Ayətullah Seyid Əli Xameneinin mübarək nəşinin Tehran Müsəllasına gətirilməsinin ilk kadrlarını yayımlayıb və bunun ardınca bir neçə gün davam edəcək dəfn mərasimi ərəfəsində baş verənlərə diqqət çəkib.
Media orqanı həmçinin şəhid imamın nəşinin Tehranın İmam Xomeyni (r.ə) Müsəllasına izdiham arasında gətirilməsi və onun İslam Respublikasının bayrağına bürünməsi ilə bağlı görüntüləri də yayımlayıb.
CNN şəhid liderin matəm mərasimindəki insanları nümayiş etdirərək yazıb: "Cümə günü Tehranda qara geyimli yas saxlayanlar Ayətullah Seyid Əli Xamenei ilə vida mərasimində iştirak ediblər; bu mərasim İran liderinin bir neçə gün davam edəcək dəfn mərasimindən əvvəl baş tutub".
CNN həmçinin "KHAMENEI.IR" saytında yayımlanan, İmam Hüseynin (ə) hərəminin qırmızı bayrağının şəhid liderin nəşi üzərinə qoyulması ilə bağlı ilk şəkli yenidən paylaşıb.
Bu arada "The Guardian" xəbər saytı da şəhid liderin dəfn mərasiminə xüsusi yer ayıraraq, qarşıdakı günlərdə milyonlarla insanın bu mərasimdə iştirak edəcəyinin gözlənildiyini bildirib. "The Guardian" davamında yazıb: "İnqilab liderinin nəşinin əzəmətli dəfn mərasimi dünyanın digər yerlərinə müqavimət mesajı çatdırmaq məqsədilə beş şəhərdə keçiriləcək".
"Reuters" agentliyi də bu mərasimi işıqlandıraraq yazıb: "İran bir həftəlik geniş matəm mərasimi ilə şəhid liderinin dəfninə hazırlaşır". Britaniya mediası əlavə edib: "Şəhid liderin dəfn mərasimi İranın müasir tarixinə mühüm bir an kimi həkk olunur. Dəfn mərasiminin Tehran, Qum, Məşhəd və İraqda keçirilməsi planlaşdırılır".
"France 24" telekanalı da şəhid liderlə vida mərasimini işıqlandıraraq "İran Ayətullah Əli Xamenei ilə son vidaya hazırlaşır" başlığı ilə yazıb. Bu fransız mediası həmçinin qeyd edib ki, İran Ayətullah Əli Xameneinin dəfn mərasiminə hazırlaşarkən, ABŞ və İsrail rejimini hər hansı bir hücuma qarşı xəbərdar edib. "France 24" əlavə edib ki, şənbə günündən etibarən üç gün davam edəcək hörmət əlaməti olaraq təkcə Tehranda təxminən 15 milyon insanın iştirak edəcəyi gözlənilir.
"The Washington Post" qəzeti də İran İslam İnqilabının şəhid lideri Ayətullah Seyid Əli Xameneinin vida və yola salınma mərasiminin ilk gününün detallarını dərc edərək, İranda və İraqda keçiriləcək bir neçə günlük dəfn mərasiminə diqqət çəkib. "Washington Post" yazıb: "İran mediası bildirib ki, İran liderinin nəşi tabut içərisində platformanın üzərinə qoyulub və önünə qırmızı lalələr düzülüb".
Media orqanının yazdığına görə, İran bayrağına bürünmüş şəhid liderin nəşi Tehranın böyük Müsəllasına çatıb. Dini liderlər, rəsmilər və xarici şəxsiyyətlər rəsmi mərasimdə şəhid imama və onunla birlikdə şəhid olan ailə üzvlərinə, o cümlədən 14 aylıq nəvəsi Zəhra Məhəmmədi Gülpayqaniyə ehtiramlarını bildiriblər.
Ərəb mediasında şəhid liderin vida mərasiminin ilk gününün əksi
Ərəb mediası İran İslam İnqilabının lideri şəhid Ayətullah Seyid Əli Xameneinin Tehran Müsəllasında keçirilən vida mərasiminin ilk gününü və bu mərasimdə iştirak etmək üçün xarici heyətlərin kütləvi gəlişini geniş şəkildə işıqlandırıb.
Yəmənin "Al-Masirah", Rusiyanın "Sputnik", Fələstinin "Qods", "Al-Araby TV", İraqın "Sabereen News", "Al-Araby Al-Jadeed" qəzeti, "Al Jazeera", "Al-Nashra", "Al-Ahed" saytı və "Al-Mayadeen" şəbəkəsi şəhid liderin nəşinin Tehranın İmam Xomeyni (r.ə) Müsəllasına gətirilməsi və vida mərasimində iştirak edən beynəlxalq heyətlərin ehtiramı ilə bağlı xəbərlər və reportajlar yayımlayıblar.
4361856
