Norveçin İsrail rejiminin FİFA-dan kənarlaşdırılması üçün başlatdığı kampaniya
“İQNA”, "Əl-Aləm"ə istinadən xəbər verir ki, "Politico" qəzetinin məlumatına görə, Norveç Futbol Federasiyası beynəlxalq futbol qurumları daxilindəki təsir imkanlarını işə salaraq, İsrail rejiminin FİFA-dan uzaqlaşdırılması istiqamətində səylərini gücləndirib.
Bu kampaniyaya rəhbərlik edən Norveç Futbol Federasiyasının sədri Lise Klaveness hüquqşünas və Norveç qadınlardan ibarət milli komandasının keçmiş oyunçusudur; o, hazırda Avropa Futbol Assosiasiyaları İttifaqının (UEFA) İcraiyyə Komitəsinin üzvüdür. Klaveness oyunları birtərəfli şəkildə boykot etmək əvəzinə, İsrail rejiminin cəzalandırılması məsələsini FİFA və UEFA-nın rəsmi qərar qəbul etmə mexanizmlərinə daxil etməyə çalışır.
Daha əvvəl qaydaların bərabər tətbiqinin vacibliyini vurğulayan Klaveness demişdi: "Biz inanırıq ki, İsrail rejimi kənarlaşdırılmalıdır və bu məsələ qaydalara riayət edilməsi ilə bağlıdır". O, FİFA və UEFA nizamnamələrinin pozulması ilə bağlı müzakirələrin dayandırılmamalı olduğunu və idman qurumlarının Qəzzadakı genişmiqyaslı insan iztirablarına qarşı laqeyd qala bilməyəcəyini qeyd edib.
Norveç Futbol Federasiyası İsrail rejiminə qarşı Dünya Kuboku seçmə mərhələ oyununu birtərəfli qaydada boykot etməkdən çəkinib; çünki bu, texniki məğlubiyyətlə nəticələnərək 3 xalın İsrailə verilməsinə və onların turnirə çıxma şansının artmasına səbəb ola bilərdi. Norveç nəticə etibarilə bu matçda 5:0 hesabı ilə qələbə qazanıb.
FİFA və UEFA Ukrayna müharibəsi başlayandan sonra Rusiya milli və klub komandalarını dərhal kənarlaşdırmışdı, lakin Qəzzadakı müharibəyə və fələstinlilərin hüquqlarının pozulması ilə bağlı ittihamlara baxmayaraq, İsrailin idman komandaları hələ də beynəlxalq yarışlarda iştirak etməkdə davam edir.
Fələstin Futbol Federasiyası tərəfindən qaldırılan işdə İsrail rejiminin Qəzzaya hücumları ilə yanaşı, fələstinli və ərəb idmançılara qarşı ayrı-seçkilik, eləcə də işğal altındakı İordan çayının qərb sahilindəki qeyri-qanuni qəsəbələrdə yerləşən klubların İsrailin futbol yarışlarında iştirak etməsi faktları əsas götürülür. Bu işi dəstəkləyən hüquqşünaslar bildirirlər ki, bu cür hərəkətlər FİFA-nın ayrı-seçkiliyin qadağan edilməsi, insan haqları və işğal olunmuş ərazilərdə klubların fəaliyyəti ilə bağlı qaydalarına ziddir.
"Politico"nun təhlilinə görə, Norveçin bu kampaniyaya qoşulması İsrail rejiminin kənarlaşdırılması tələbini ərəb və Asiya federasiyaları çərçivəsindən çıxararaq Avropa futbol strukturunda ciddi müzakirə mövzusuna çevirib.
Norveç Futbol Federasiyası həmçinin İsrail rejimi ilə keçirilən matçın bilet satışından əldə olunan gəliri Qəzzadakı tibbi və yardım fəaliyyətlərinə bağışlayıb. Stadiondakı tamaşaçılar da Fələstin bayraqları və şərfləri ilə gələrək, "Uşaqların yaşamasına icazə verin" yazılı plakatlar nümayiş etdiriblər.
Bu təzyiqlərin davam etməsinə baxmayaraq, FİFA indiyədək İsrail Futbol Federasiyasını kənarlaşdırmayıb. Yayılan məlumatlara görə, qurum mart ayında cəza tədbiri tətbiq etməkdən imtina edib, lakin İsrail federasiyasını ayrı-seçkilik və təhqiramiz davranışlarla bağlı pozuntulara görə 150 min İsveçrə frankı məbləğində cərimələyib və onları ayrı-seçkiliklə mübarizə üçün məcburi bir proqram icra etməyə vadar edib.
4364413
