"İQNA"-nın "mississippifreepress"-ə istinadən verdiyi məlumata görə, ABŞ-da yəmənli mühacir ailəsində doğulan Əsma Əli Missisipinin Delta bölgəsindəki Bolivar qəzasının cənub-qərbində yerləşən "Benoit" şəhərinin məhkəməsinə hakim təyin edilib və and içib.

Əli on ilə yaxındır ki, Missisipidə vəkillik edir. O, 2017-ci ildə Missisipi Xristian Universitetinin hüquq fakültəsini bitirdikdən sonra Rankin və Medison qəzalarında staj keçib.

Əsma Əli bildirib: "Ümid edirəm ki, xidmət etmək fürsəti tapacağam".

Şəhər məhkəmələrinin hakimləri şəhər qaydalarının pozulması və yüngül dövlət cinayətləri ilə bağlı işlərə baxmaq üçün cavabdehdirlər və bu məhkəmələrdə münsiflər heyəti olmur.

Müsəlman hakimə qarşı virtual təqiblərin başlanması

Benoit şəhərinin əhalisinin 400 nəfərdən az olmasına baxmayaraq, Əlinin təyin olunması xəbəri sosial şəbəkələrdə sürətlə yayılıb və bununla yanaşı, yanlış məlumatlar və onlayn təqib dalğası yaranıb.

Missisipidə bəzi siyasi simalar və məşhur istifadəçilər səhvən iddia ediblər ki, Əsma Əli başqa bir şəhərdə - "Ridgeland"da təyin edilib.

Əli deyib: "Mən heç vaxt Ridgeland adını çəkməmişəm. Ofisim Ridgeland-dadır və elə düşünürəm ki, qarışıqlıq buradan başlayıb. Amma yazılarımın heç birində Ridgeland adını qeyd etməmişəm".

Ridgeland bələdiyyəsi də bir bəyanat yayaraq bu iddianı təkzib edib və bildirib ki, şəhərin məhkəmə hakimləri 2001-ci ildən təyin edilib və heç bir vakansiya və ya yeni təyinat yoxdur.

Missisipi qanunlarına görə, əhalisi 10 min nəfərdən az olan şəhərlərdə şəhər hakimi təyin etmək məcburi deyil. Lakin belə bir hakim təyin olunarsa və əhali 20 min nəfərdən azdırsa, hakim ştat tərəfindən lisenziyası olan vəkil və ya qəza məhkəməsinin hakimi olmalıdır.

Əsma Əli və Ridgeland rəsmiləri şayiələri aradan qaldırmaqla məşğul olarkən, Əlinin ofisi hədə-qorxu dolu mesajlar almağa başlayıb.

O, "vəziyyət həqiqətən pisdir" deyərək, məhkəmə vəzifəsi səbəbilə təfərrüatlar haqqında danışa bilməyəcəyini açıqlayıb.

Əsma Əli müsəlmandır və hicablıdır; ona qarşı onlayn hücumların böyük bir hissəsi onun dini mənsubiyyəti üzərində qurulub.

O bildirib: "Mən ABŞ-da doğulmuşam, ABŞ-da təhsil almışam, hakim olmaq üçün lazım olan bütün sənədlərə sahibəm. Mən xristianlığın əleyhinə deyiləm; xristian hüquq məktəbində oxumuşam və hətta həmin məktəbdə kirayəsini özüm ödədiyim bir otağım da var".

Buna baxmayaraq, Missisipi ştatının Respublikaçı senatoru Maykl Maklendon onun vəzifədən kənarlaşdırılmasını tələb edib.

Əsma Əli qeyd edib: "Mən sadəcə bir qanunu təmsil edirəm: ABŞ Konstitusiyasını. Niyə başqa bir qanunu icra etməliyəm? Mən ABŞ-da doğulub böyümüşəm. Niyə təkcə müsəlman olduğum üçün kənarlaşdırılmalıyam?"

O, sözlərini belə yekunlaşdırıb: "Bu, həqiqətən pis və çox kədərlidir, çünki heç vaxt ABŞ-da belə bir halla qarşılaşacağımı ağlıma belə gətirməzdim".

4369232