ہر قسم کی جنگ بندی کی خلاف ورزی کا جواب دیں گے
ایکنا نیوز- ایران ریڈیو-یمن کے المسیرہ ٹی وی چینل کی رپورٹ کے مطابق یمنی فوج کے ترجمان شرف لقمان نے جمعے کو جنگ بندی کا خیر مقدم کرتے ہوئے کہا ہے کہ یمن کی فوج اور سیکورٹی اہلکار جنگ بندی کی خلاف ورزی کا بھرپور جواب دیں گے- شرف لقمان نے کہا کہ سعودی فوج کے حملوں کا جواب دینا یمنی فوج کا قانونی حق ہے تاکہ وہ، اپنی سرزمین کا دفاع کر سکے اور یہ کام بین الاقوامی قوانین کی بنیاد پر انجام پا رہا ہے- یمنی فوج کے ترجمان نے کہا کہ اقوام متحدہ کی جانب سے جنگ بندی کا اعلان اور یمن پر سعودی عرب کے حملے بند کئے جانے کا فیصلہ، اقوام متحدہ اور عالمی برادری کی ذمہ داری کی بنیاد پر ہوا ہے- واضح رہے کہ اقوام متحدہ نے جمعے کو ماہ مبارک رمضان کے اختتام تک یمن میں جنگ بندی کا اعلان کیا ہے- یہ ایسی حالت میں ہے کہ سعودی لڑاکا طیاروں نے ہفتے کی صبح کو جنگ بندی کی خلاف ورزی کرتے ہوئے صوبہ صعدہ کے الحظیرہ علاقے پر حملہ کیا جس میں سات عورتیں اور بچے شہید ہو گئے- سعودی لڑاکا طیاروں نے صنعا کے صوبے تعز اور عدن کو بھی اپنے وحشیانہ حملوں کا نشانہ بنایا-
