خیبرپختونخوا: ضلع کرم کے اسکول میں فائرنگ، 7 افراد جاں بحق

ایکنا تھران: ضلع کرم میں نامعلوم افراد کی فائرنگ کے مختلف واقعات میں شیعہ اساتذہ سمیت 8 افراد جاں بحق ہوگئے۔

ایکنا انٹرنیشنل ڈیسک کے مطابق پولیس کے مطابق نامعلوم افرادنے فائرنگ اسکول کے اسٹاف روم میں کی، فائرنگ کے واقعے کے بعداسپتالوں میں ایمرجنسی نافذ کردی گئی ہے۔

فائرنگ کا نشانہ بنائے گئے تمام ٹیچر امتحانی ڈیوٹی پر تھے۔ اس سے قبل  آج پارہ چنار میں چلتی گاڑی پر فائرنگ کرکے ایک ٹیچر کوقتل کیا گیا تھا۔ چلتی گاڑی پرفائرنگ کرکے قتل کیے گئے استاد کا تعلق بھی تری مینگل ہائی اسکول سےتھا۔ ٹیچرمحمد شریف کو شلوزان روڈ پر فائرنگ کا نشانہ بنایا گیا۔

انہوں نے بتایا کہ اس کے بعد فائرنگ کے مختلف واقعات پیش آئے، ان واقعات میں متعدد افراد کے جاں بحق اور زخمی ہونے کی اطلاع پر ہسپتال میں ایمرجنسی نافذ کردی گئی ہے۔

پولیس کے مطابق اپر کرم میں شلوزان روڈ پر نامعلوم افراد کی جانب سے چلتی گاڑی پر فائرنگ کی گئی، جس کے نتیجے میں ایک شہری جاں بحق ہوگیا۔

انہوں نے کہا کہ اس واقعے کے بعد مسلح افراد نے تری منگل ہائی اسکول میں گھس کر 7 اسکول ٹیچرز کو قتل کر دیا۔ مبینہ طور پر قتل ہونے والے  ٹیچروں کا تعلق اہل تشیع سے بتایا جاتا ہے۔

ان واقعات کے بعد ضلع بھر کے ہسپتالوں میں ایمرجنسی نافذ کردی گئی ہے اور ضلع بھر میں تمام راستے سیکیورٹی خدشات کے باعث بند کردیے گئے ہیں۔