سمرقند، سال 2025 میں اسلامی ثقافتی مرکز
ایکنا نیوز- اناطولی نیوز ایجنسی کے مطابق اسلامی دنیا کی تعلیمی، سائنسی و ثقافتی تنظیم (آیسسکو) اور ازبکستان کی وزارتِ ثقافت کے اشتراک سے "سمرقند" کو 2025 کے لیے عالمِ اسلام کا ثقافتی دارالحکومت قرار دینے کی افتتاحی تقریب 27 مئی کو منعقد ہوگی۔
یہ پروگرام آیسسکو کے "ثقافتی دارالحکومتوں" کے سلسلہ کا حصہ ہے، جس کا آغاز ازبکستان میں ایک بین الاقوامی کانفرنس سے ہوگا جس کا موضوع ہو گا "اسلامی دنیا میں روحانی ورثہ اور ثقافتی مظاہر: خوشنویسی، موسیقی، شاعری اور یکجہتی"۔
اس بین الاقوامی کانفرنس میں آیسسکو کے رکن ممالک کے وزرائے ثقافت اور بین الاقوامی تنظیموں و اداروں کے نمائندگان شرکت کریں گے۔
اسی مناسبت سے، آیسسکو کے ڈائریکٹر جنرل ڈاکٹر سلیم بن محمد المالک نے کہا کہ یہ جشن آیسسکو اور ازبکستان کے قومی حکام کے تعاون سے ترتیب دیے گئے متنوع اور بھرپور پروگراموں، سرگرمیوں اور اقدامات پر مشتمل ہوگا۔
انہوں نے مزید کہا کہ ان سرگرمیوں کا مقصد سمرقند کے ثقافتی دارالحکومت کے عنوان کو فروغ دینا، اس کے عظیم ثقافتی و تاریخی ورثے کو اجاگر کرنا اور اسلامی تہذیب میں اس کے کلیدی کردار کو ایک بار پھر نمایاں کرنا ہے۔
ڈاکٹر المالک نے اس بات پر زور دیا کہ آیسسکو سمرقند کے اس جشن کو اس کے بلند ثقافتی مقام کے شایانِ شان انداز میں منعقد کرنے کے لیے پُرعزم ہے۔
انہوں نے واضح کیا کہ وزارتِ ثقافت ازبکستان کے تعاون سے ایک جامع پروگرام ترتیب دیا گیا ہے، اور امید ظاہر کی کہ سمرقند کا یہ جشن آئندہ اسلامی ثقافتی دارالحکومتوں کے لیے ایک نمونہ بنے گا۔
تقریب کے پروگرام میں شامل اہم سرگرمیاں درج ذیل ہیں:
- مراکش کے دارالحکومت رباط میں ازبک ثقافت کا ہفتہ، جو "اسلامی ثقافتی دارالحکومتوں" کے پروگرام کی 30 ویں سالگرہ کے موقع پر منعقد ہوگا؛
بین الاقوامی کانفرنسیں، جن میں ماوراءالنہر کے عظیم مسلم دانشوروں — جیسے خوارزمی، بیرونی، اور ابن سینا — کے انسانی تہذیب پر اثرات کا جائزہ لیا جائے گا؛
اسلامی ورثے کے فنون، قدیم مخطوطات، ادب اور فنِ تعمیر پر عالمی سطح کی علمی نشستیں؛
شاعری اور فوٹوگرافی کے بین الاقوامی مقابلے بھی اس جشن کا حصہ ہوں گے۔
4284813
