انڈین مفتی: بڑے بحران سیرت النبی سے دوری کا نتیجہ ہے

ایکنا: انڈین مفتی اعظم نے کہا ہے کہ بحرانوں کی اصل وجہ نبوی تعلیمات سے دوری ہے۔

ایکنا نیوز- ہندوستان کے مفتیِ اعظم شیخ ابوبکر احمد نے ریاست کرالا کے شہر کالیکوٹ میں منعقدہ بین الاقوامی کانفرنس برائے میلادالنبی ﷺ سے خطاب کرتے ہوئے کہا کہ رسول اکرم ﷺ کی رسالت آفاقی اور ہمہ گیر ہے، اور آج دنیا کو درپیش بڑے بڑے بحران دراصل نبوی اقدار اور تعلیمات سے دوری کا نتیجہ ہیں۔

یہ کانفرنس ۱۳ ستمبر کو سنی کلچرل سنٹر یونیورسٹی، بھارت کے زیر اہتمام منعقد ہوئی، جس میں بھارت سمیت دنیا کے مختلف ممالک کے علما، دانشور اور اہلِ فکر شریک ہوئے۔

شیخ ابوبکر احمد نے اپنے خطاب میں رسالت نبوی کے مختلف پہلوؤں پر روشنی ڈالی اور موجودہ امت مسلمہ کے مسائل، خصوصاً مسئلہ فلسطین کو اجاگر کیا۔ انہوں نے کہا کہ مدینہ منورہ میں رسول اللہ ﷺ نے ایک ایسا ہمہ گیر تمدنی ماڈل قائم کیا جو عدل، مساوات، وحدت و اخوت، معاشی ترقی، امن و سلامتی، تعلیم و معرفت اور مشاورت و شراکت پر مبنی تھا۔

انہوں نے زور دیا کہ انہی اقدار کی کمی نے آج ظلم و فساد، تفرقہ، اور انسانی وقار کے زوال جیسے بڑے بحران پیدا کر دیے ہیں۔

شیخ احمد نے مزید کہا کہ اقوامِ متحدہ کی جنرل اسمبلی میں آزاد فلسطینی ریاست کے قیام کے حق میں قرارداد کی حمایت پر بھارت کے مؤقف کو سراہا جانا چاہیے، کیونکہ یہ ایک ستائش کے قابل اور انسان دوست اقدام ہے۔

انہوں نے پوری دنیا سے اپیل کی کہ وہ فلسطینی عوام کے ساتھ کھڑی ہو، جو جنگ کی بھٹی میں سب کچھ کھو بیٹھے ہیں۔ انہوں نے خبردار کیا کہ اسرائیل کی توسیع پسندانہ پالیسیاں غزہ، قطر، یمن اور لبنان میں انتشار و بدامنی کو ہوا دے رہی ہیں، جو کسی طور قابلِ جواز نہیں۔

آخر میں انہوں نے کہا کہ بھارتی حکومت کو چاہیے کہ وہ مشرقِ وسطیٰ میں، جہاں لاکھوں بھارتی تارکین وطن مقیم ہیں، اپنے بین الاقوامی اثر و رسوخ کو بروئے کار لائے تاکہ خطے میں امن قائم ہو اور عالمی صلح کی کوششیں تیز تر ہو سکیں۔/

4305160