فلسطینی فاونڈیشن؛ انسانی برادری ایوارڈ کے لیے نامزد
ایکنا نیوز- صدی البلد نیوز کے مطابق زاید انسانی برادری ایوارڈ نے سال 2026 میں اپنے ساتویں ایڈیشن کے لیے اپنے تیسرے منتخب کردہ اعزاز یافتہ کا اعلان کر دیا ہے۔ اس کے مطابق فلسطینی انسانی فلاحی ادارہ ’’التعاون‘‘ کو 4 فروری 2026 (15 بہمن) کو منعقد ہونے والی ایوارڈ تقریب میں، جمہوریہ آذربائیجان اور آرمینیا کے درمیان تاریخی امن معاہدے اور زرقا یفتالی (افغانستان میں خواتین کی تعلیم کی علمبردار) کے ساتھ اعزاز سے نوازا جائے گا۔
اس ادارے کا انتخاب اس کی ان انسانی خدمات کے اعتراف میں کیا گیا ہے جو ہر سال فلسطین میں دس لاکھ سے زائد افراد کی زندگیوں پر مثبت اثر ڈالتی ہیں۔
التعاون فاؤنڈیشن نے اپنے قیام 1983 سے اب تک ایک ارب ڈالر سے زائد کی سرمایہ کاری مختلف شعبوں میں کی ہے، جن میں تعلیم، نوجوانوں کو بااختیار بنانا، یتیموں کی سرپرستی، ثقافت کا فروغ، قدیم شہروں کی بحالی، صحت، زراعت، سماجی ترقی اور ہنگامی انسانی امداد شامل ہیں۔
یہ ادارہ اب تک 8200 سے زائد منصوبے مکمل کر چکا ہے، جن کے ذریعے فلسطینی معاشرے خصوصاً نوجوانوں کو بااختیار بنانے، سماجی و ثقافتی ترقی، فلسطینی ورثے کے تحفظ اور پائیدار ترقی کو فروغ ملا ہے۔
محمد عبدالسلام، زاید انسانی برادری ایوارڈ کے سیکریٹری جنرل، نے کہا کہ ساتویں ایڈیشن میں التعاون فاؤنڈیشن کو تیسرے اعزاز یافتہ کے طور پر منتخب کیا جانا، اس ادارے کی اُن انسانی خدمات کا اعتراف ہے جنہوں نے انتہائی مشکل حالات میں انسانی وقار کے تحفظ اور فلسطینی معاشرے کی استقامت کو مضبوط بنانے میں نمایاں کردار ادا کیا ہے۔
انہوں نے مزید کہا کہ التعاون فاؤنڈیشن نے انسانی خدمت اور ترقی کا ایک مثالی اور پیش رو ماڈل پیش کیا ہے، اور اپنی سرگرمیوں کو فوری امداد سے آگے بڑھاتے ہوئے تعلیم، صحت، نوجوانوں کو بااختیار بنانے اور سماجی ہم آہنگی کی حمایت میں طویل المدتی سرمایہ کاری تک وسعت دی ہے۔
واضح رہے کہ زاید انسانی برادری ایوارڈ امارات کے حکمران شیخ محمد بن زاید کی جانب سے دیا جاتا ہے۔ یہ ایوارڈ انسانی برادری کے تاریخی دستاویز کے تحت دیا جاتا ہے، جس پر 4 فروری 2019 کو امارات کے پہلے دورے کے دوران پوپ اور شیخ الازہر نے دستخط کیے تھے۔
یہ ایوارڈ، جو ہر سال 4 فروری، عالمی یومِ انسانی برادری کے موقع پر دیا جاتا ہے، ایک آزاد اور عالمی سالانہ اعزاز ہے، جس میں 10 لاکھ امریکی ڈالر کی انعامی رقم شامل ہے۔
اس ایوارڈ کے ذریعے افراد، تنظیموں اور اداروں کو انسانی برادری کے فروغ میں ان کی خدمات پر سراہا جاتا ہے، جبکہ اعزاز یافتگان کو ابوظبی میں منعقد ہونے والی ایک خصوصی تقریب میں خراجِ تحسین پیش کیا جاتا ہے۔/
4330849
