سرداب حرم عباسی(ع)؛ نیمه شعبان پر زائرین کے لیے آمادہ
ایکنا نیوز- آستانِہ مقدس حضرت عباسؑ کی ویب سائٹ کے حوالے سے شعبۂ خدماتِ زائرین کے نائب سربراہ عباس علی ابوالعوف نے بتایا کہ اس شعبے کے عملے نے امام مہدیؑ (عج) کی ولادت باسعادت کی تقریبات میں شریک ہونے والی خواتین زائرین کے استقبال کے لیے سردابوں کو تمام رفاہی سہولیات سے آراستہ کر دیا ہے۔
انہوں نے مزید کہا کہ ان سردابوں میں قرآنِ مجید کے نسخے، جائے نمازیں، دعاؤں کی کتب اور زیارت سے متعلق آداب فراہم کیے گئے ہیں، تاکہ ضروری خدمات کی فراہمی کے ساتھ ساتھ زائرین کے لیے مناسکِ زیارت کی ادائیگی کو آسان بنایا جا سکے۔
ابوالعوف کے مطابق، شعبے کا عملہ خواتین زائرین کی آسان اور رواں آمد و رفت کو یقینی بنانے، نیز مقررہ مقامات پر صفائی، آرام اور سہولت میں اضافے کے لیے بھرپور کوششیں کر رہا ہے۔
جبکہ نصفِ شعبان میں دو دن باقی ہیں، نجف اشرف، کاظمین اور سامرہ سے پیدل زیارت کا آغاز ہو چکا ہے اور زائرین کی تعداد میں اضافے کا امکان ہے۔ اس موقع پر سیکیورٹی فورسز اور حشد الشعبی نے 1600 سے زائد ثابت اور متحرک کیمروں کے ذریعے زائرین کی آمد و رفت اور موکبوں کی سرگرمیوں کی نگرانی کا انتظام کیا ہے۔
آستانِہ مقدس حسینی و عباسیؑ (علیہما السلام) کی انتظامیہ نے میدانی کوششوں کو یکجا کرنے، موکبوں اور زائرین کی نقل و حرکت کو سہل بنانے اور ایامِ زیارت میں خدمات کی بلا رکاوٹ فراہمی کو یقینی بنانے کے لیے جامع انتظامات کیے ہیں۔
یہ انتظامیہ مسلسل خدماتی موکبوں کی نگرانی، انہیں ضروری معاونت اور رہنمائی فراہم کر رہی ہے، تاکہ زیارتِ نصفِ شعبان کی تقریبات اس عظیم اور مقدس موقع کی شان کے مطابق بخوبی انجام پا سکیں۔
واضح رہے کہ زیارتِ نصفِ شعبان کربلائے مقدس کی سالانہ زیارات میں سے ایک اہم ترین زیارت ہے، جس میں عراق اور بیرونِ ملک سے لاکھوں زائرین امامِ زمانہؑ (عج) کی ولادت کے موقع پر شرکت کے لیے کربلاء کا رخ کرتے ہیں۔/
4331847
