مکه میں ساٹھ صفحات پر مبنی نادر قرآنی نسخے کی نمائش
ایکنا نیوز- خبررساں ادارے voiceofemirates کے مطابق یہ مخطوطہ اسلام کے ابتدائی دور سے ہی مسلمانوں کی قرآنِ کریم کے ساتھ غیر معمولی وابستگی کا ثبوت ہے، جس میں قرآن کی حفاظت، نقل اور اس کی دستاویز بندی کا سلسلہ صدیوں تک جاری رہا۔
یہ نسخہ ان قرآنی مخطوطات میں شامل ہے جو عجائب گھر میں محفوظ ہیں۔ اس میں قدیم عربی خطاطی کے اسالیب اور مختلف ادوار کے خوشنویسوں کے استعمال کردہ طریقۂ تحریر کی جھلک نمایاں طور پر دیکھی جا سکتی ہے۔ اپنے چھوٹے حجم کے باوجود، اس نسخے میں متنِ قرآن کے احترام، تقدس اور کتابت کی غیر معمولی دقت کو پوری طرح برقرار رکھا گیا ہے۔
عجائب گھر کے منتظمین کے مطابق یہ نادر نسخہ صرف ایک تاریخی دستاویز نہیں بلکہ گہری ثقافتی اور روحانی اہمیت بھی رکھتا ہے۔ یہ قرآنِ کریم کی حفاظت کے لیے مسلمانوں کی تاریخی کاوشوں کی عظیم مثال پیش کرتا ہے اور اس بات کو بھی واضح کرتا ہے کہ قرآن کی تعلیمات کس قدر احتیاط اور امانت داری کے ساتھ نسل در نسل منتقل کی گئیں۔
رپورٹ کے مطابق عجائب گھر زائرین کو یہ موقع فراہم کرتا ہے کہ وہ قرآنی خطاطی کے ارتقائی سفر کا مشاہدہ کریں، جو جانوروں کی کھال پر لکھی گئی ابتدائی تحریروں سے لے کر مختلف اسلامی ادوار میں تیار ہونے والے مزین اور مصور نسخوں تک پھیلا ہوا ہے۔ یہ اسلامی ورثے کی وسعت اور اس کے فنی مکاتب کے تنوع کو اجاگر کرتا ہے۔
یہ نادر قرآن مکہ مکرمہ آنے والے زائرین کی بھرپور توجہ کا مرکز بن گیا ہے۔ بہت سے لوگ اس کے سامنے رک کر اس کی خطاطی کی باریکیوں اور اس کی شاندار دستاویز بندی کے حسن کو غور سے دیکھتے اور اس پر تدبر کرتے ہیں۔/
4351543
