Əl-Əzhərin şeyxi: “İtaliyanın Fələstini rəsmən tanımasını gözləyirik”
“İQNA”-nın “əl-Ümmə”yə istinadla verdiyi xəbərə görə, Əl-Əzhərin şeyxi və Müsəlman Müdriklər Şurasının sədri Əhməd ət-Tayyib Roma şəhərində “Sent Ecidio Cəmiyyəti” tərəfindən təşkil olunan Ümumdünya Sülh Konfransının kənarında İtaliya prezidenti Sercio Mattarella ilə görüşüb və İtaliyadan Fələstin dövlətini rəsmən tanımasını istəyib.
Əhməd ət-Tayyib həmçinin İtaliya xalqının fələstinlilərlə həmrəyliyini və sionist rejimin Qəzzəyə davamlı hücumlarına qarşı keçirilən kütləvi etiraz nümayişlərini yüksək qiymətləndirib.
O deyib: “Biz İtaliya xalqının prinsipial mövqeyini təqdir edirik və ümidvarıq ki, İtaliya Fələstin dövlətini rəsmən tanıyan ölkələrin artmaqda olan siyahısına qoşulacaq. Bu addım paytaxtı Şərqi Qüds olan müstəqil Fələstin dövlətinin yaradılması istiqamətində mühüm bir addım olacaq.”
O vurğulayıb ki, Əl-Əzhər hələ də sülhün — İslamın əsas mesajının — təşviqinə və iman haqqında yanlış təsəvvürlərlə mübarizəyə beynəlxalq dini və mədəni qurumlarla dialoq və əməkdaşlıq yolu ilə sadiqdir.
Əhməd ət-Tayyib 2019-cu ildə mərhum Papa Fransisklə Əbu-Dabidə “İnsani qardaşlıq sənədi”ni imzaladığını xatırladaraq bildirib ki, bu təşəbbüs hələ də dinlərarası dialoqun və irqçilik, ifratçılıq və nifrət yayılması ilə mübarizənin təşviqinə davam edir.
Prezident Mattarella isə Əl-Əzhər şeyxinin sülhü təşviq etməyə yönəlmiş səylərini və onun Papa Fransisklə yaxın münasibətlərini yüksək qiymətləndirib və “İnsani qardaşlıq sənədi”ni “qlobal sülhün və dinlərarası dialoqun təşviqində dönüş nöqtəsi” adlandırıb.
O, həmçinin Əhməd ət-Tayyibin konfransın açılış sessiyasında etdiyi çıxışı tərifləyərək onu “sülhün əldə olunması üçün mənalı mesajlarla və praktik tövsiyələrlə zəngin” adlandırıb.
Mattarella İtaliyanın prezident Əbdülfəttah əs-Sisinin rəhbərliyi altında Misirin Qəzzədə atəşkəsin təmin edilməsi və Yaxın Şərqdə sülh prosesinin irəliləməsi istiqamətindəki səylərinə verdiyi qiyməti ifadə edib və mülki əhaliyə humanitar yardımın çatdırılmasının təmin edilməsinin vacibliyini vurğulayıb.
Tərəflər Əl-Əzhər, Müsəlman Müdriklər Şurası və Katolik Kilsəsi arasında davam edən əməkdaşlıq, xüsusilə qadınların gücləndirilməsinə və gənclərin sülh quruculuğunda iştirakına yönəlmiş təşəbbüslər barədə fikir mübadiləsi aparıblar. Onlar dinlərarası dialoqa dəstək və dinc birgəyaşayışın təşviqi istiqamətində ortaq öhdəliklərini bir daha təsdiqləyiblər.
4313458
