Sionist rejimin həbsxanalarında 98 fələstinlinin şəhadəti
“Əl-Cəzirə”nin verdiyi xəbərə görə, Fələstinli Məhbusların Media Ofisi bildirib ki, “Həkimlər İnsan Haqları–İsrail Təşkilatı”nın 7 oktyabr 2023-dən sonra işğalçı rejimin həbsxana və təcridxanalarında saxlanılan, əksəriyyəti mülki şəxslər olan 98 fələstinlinin şəhadəti ilə bağlı açıqlamaları, dünya ictimaiyyətindən gizli şəkildə həyata keçirilən məhkumların sistematik şəkildə edam edilməsinin daha bir sübutudur.
Çərşənbə günü yayılan mətbuat bəyanatında qeyd olunub: Məhbusların məhkəməsiz, ailələrinə məlumat verilmədən bu qədər sayda öldürülməsi, Roma Statutuna əsasən, beynəlxalq cinayət məhkəməsi tərəfindən müharibə cinayətləri və insanlığa qarşı cinayətlər kimi təsnif edilən hüquqdan kənar qətllərdir.
Bəyanatın başqa bir hissəsində deyilir: İşğalçılar məhbusların vəhşi işgəncə, aclıq, tibbi laqeydlik və ağır saxlanma şəraiti nəticəsində ölümünə tam məsuliyyət daşıyır.
Bəyanatda həmçinin vurğulanır ki, rejimin gizlətmə siyasəti və 7 oktyabrdan bəri saxlanılan şəxslərin “yoxa çıxması” səbəbindən həqiqi şəhid sayı açıqlanandan qat-qat çoxdur.
Məhbuslarla İş üzrə Media Ofisi bildirib: İşgəncə altında öldürülmə və məhbus hüquqlarının digər kobud pozuntuları, beynəlxalq humanitar hüququn və dördüncü Cenevrə Konvensiyasının açıq şəkildə pozulmasıdır; həmin konvensiya işğalçı qüvvələri məhbusların həyatını və ləyaqətini qorumağa məcbur edir.
Bəyanatda, həmçinin, Beynəlxalq Qızıl Xaç Komitəsi və BMT-nin İnsan Haqları üzrə Ali Komissarlığından dərhal müstəqil beynəlxalq istintaqa başlamaq, saxlanılan şəxslərə çıxışı təmin etmək, davam edən qanunsuz rəftarların dayandırılmasına nail olmaq və məsulların Beynəlxalq Cinayət Məhkəməsi qarşısında cavab verməsini təmin etmək üçün tədbir görülməsi tələb olunub.
Bəyanat eyni zamanda məhbuslara dəstək məqsədilə müxtəlif sahələrdə xalq fəaliyyətlərinin gücləndirilməsini, onların azadlığı və “yoxa çıxmış” şəxslərin taleyinin açıqlanmasına qədər təzyiqlərin davam etdirilməsini istəyib.
Sonda vurğulanıb ki, məhbusların hüquqlarının müdafiəsi və onların məsələsinin izlənilməsi milli və humanitar bir vəzifədir və bundan göz yummamaq lazımdır.
4318032
