Nuri əl-Maliki: Şəhid İmam Xameneinin irsini əziz tutmaq bir vəzifədir
“İQNA”-nın İraqın rəsmi xəbər agentliyinə istinadən verdiyi məlumata görə, şəhid liderin cənazəsinin Nəcəfi-Əşrəf hava limanına gəlişi ilə eyni vaxtda İraqın "Dövlət Qanunu" koalisiyasının rəhbəri Nuri əl-Maliki bəyan edib ki, İslam ümmətinin böyük rəhbəri şəhid İmam Seyid Əli Xameneinin irsini əziz tutmaq və onun cənazə mərasimində iştirak etmək bir vəzifədir; çünki o, sabitqədəm qalan, müqavimət göstərən, çağırışlar qarşısında dayanan və İran xalqı üçün qələbə gətirən böyük bir lider idi.
Nuri əl-Maliki əlavə edib: "İraq xalqının şəhid İmam Xameneinin cənazə mərasimində iştirakı və digər dəstək mövqeləri nə qədər böyük və dəyərli olsa da, bu böyük şəxsiyyətin məqamı qarşısında hələ də azdır; o şəxsiyyət ki, təkcə İran xalqı üçün deyil, regionun bir çox ölkəsi üçün də parlaq bir gələcək yaratdı."
O, sözlərinə belə davam edib: "Bu gün etdiyimiz hər şey, sabitqədəm qalan, müqavimət göstərən və böyük hərbi gücləri ilə tanınan superdövlətlərin qarşısında dayanan bu böyük liderin xatirəsini əziz tutmaq zərurəti çərçivəsindədir. O, qələbəni reallaşdırdı və İran xalqı da onunla birlikdə səbir, dözüm və möhkəmlik sayəsində, bütün çətinliklərə və verdikləri itkilərə baxmayaraq qələbəyə çatdı. Biz bütün bunların nəticələrini istər siyasi danışıqlar meydanında, istərsə də döyüş cəbhələrində İran İslam Respublikasının uğurlarında görürük."
Nuri əl-Maliki vurğulayıb: "İraqın bugünkü aydın mesajı budur ki, İran İslam Respublikası tənha deyil; onun yanında duran və onu dəstəkləyən dostları var. İran haqq tərəfindədir və dünyanın müxtəlif yerlərində çoxlu tərəfdarları var, hətta bəzi xalqlar yaşadıqları siyasi şəraitə görə bu dəstəyi açıq şəkildə ifadə edə bilməsələr belə."
4362874
