Ali Rəhbərin İran xalqına və İraq xalqına təşəkkür mesajı çatdırıldı
“İQNA”-nın məlumatına görə, İslam İnqilabının Ali Rəhbəri Həzrət Ayətullahül-üzma Seyid Müctəba Hüseyni Xameneinin adından təşkil olunan İnqilabın Şəhid Rəhbərinin anım mərasimi çərşənbə axşamı, 14 iyul tarixində Tehrandakı İmam Xomeyni (r.ə.) Musəllasının əsas salonunda beynəlxalq qarilərdən olan Məhəmmədhüseyn Səidianın Qurani-Kərim tilavəti ilə rəsmi şəkildə başladı. Mərasimdə dövlət rəsmiləri, İnqilab aşiqi olan insanlar və Şəhid İmamın yas saxlayanları iştirak etdilər. Daha sonra Əhli-beyt (ə) məddahı Məhəmmədrza Bəzri mərsiyə oxudu.
Şəhidin anım mərasimində İnqilabın üçüncü Ali Rəhbəri ilə yenidən əhd bağlandı
Musəllanın ab-havası kədər və qəhrəmanlığın vəhdətini əks etdirirdi. İnsanların simasında və baxışlarında hələ də silinməmiş hüznlə yanaşı, imperializm əleyhinə səslənən şüarlar, Şəhid Rəhbərin ideallarına sədaqətin yenilənməsi və İnqilabın üçüncü Ali Rəhbəri Həzrət Ayətullahül-üzma Seyid Müctəba Hüseyni Xamenei ilə bir daha əhd bağlanması qəhrəmanlıq ruhunu nümayiş etdirirdi.
Bu mərasimin Məhərrəm ayının son günü ilə eyni vaxta təsadüf etməsi tədbirə əvvəlkindən daha çox Aşura ab-havası bəxş etmişdi.
Mərasimin davamında Qurani-Kərimin tanınmış qarisi Qasım Müqəddəmi müqəddəs Qurandan ayələr tilavət etdi.
Daha sonra Şəhid İnqilab Rəhbərinin böyük oğlu Höccətülislam vəl-müslimin Seyid Mustafa Hüseyni Xamenei çıxış etdi.
Ayətullah Seyid Müctəba Hüseyni Xameneinin mesajı çatdırıldı
İnqilabın Şəhid Rəhbərinin böyük oğlu çıxışının davamında İslam İnqilabının Ali Rəhbəri Ayətullah Seyid Müctəba Hüseyni Xameneinin mesajını çatdıraraq dedi: “Mənə tapşırılıb ki, Ali və möhtərəm İnqilab Rəhbərinin bu möhtəşəm, diqqətəlayiq və misilsiz ümumxalq dirçəlişinin təşkilinə görə xalqa təşəkkür və minnətdarlıq mesajını çatdırım.”
O, dəfn və anım mərasimlərində xalqın geniş və möhtəşəm iştirakına görə təşəkkür edərək əlavə etdi: “Əziz İran xalqı öz sədaqəti, uzaqgörənliyi və misilsiz iştirakı ilə elə səhnələr yaratdı ki, bunlara dözmək düşmən üçün son dərəcə ağır idi. Tehranda, Qumda, Məşhəddə və ölkənin digər bölgələrində milyonlarla insanın iştirakı öz dərin mənası ilə mənim daha əvvəl işarə etdiyim həqiqəti gerçəkləşdirdi və şübhəsiz ki, bunun təsir və bərəkətləri gələcəkdə aydın şəkildə özünü göstərəcək.”
Höccətülislam Hüseyni Xamenei həmçinin bu mərasimlərin təşkilində iştirak edən bütün şəxslərə təşəkkür etdi, daha sonra isə İraq xalqına və İraqın məsul şəxslərinə də minnətdarlığını bildirdi.
4363941
