د ایکنا د راپور له مخې، د «مالای میل» په حواله، ملایشیا په چټکۍ سره د جاپاني خوراکي توکو په یوه لوی بازار بدلېږي او د روان کال په لومړیو پنځو میاشتو کې دغه هېواد ته د جاپان صادرات ۴۲.۳ سلنه زیات شوي دي.

په کوالالمپور کې د جاپان د بهرني تجارت سازمان (JETRO) اجرائي مشر کوئیچي تاکانو وویل، ملایشیا د جاپان د کرهنیزو، ځنګلدارۍ، کب نیونې او خوراکي محصولاتو د صادراتي بازارونو په منځ کې له پخواني دیارلسم مقام څخه لسم مقام ته پورته شوې ده.

هغه وویل: «ملایشیا اوس د جاپان د کرهڼیزو، ځنګلدارۍ، کب نیونې او خوراکي محصولاتو د ټولو صادراتي بازارونو په منځ کې لسم مقام لري.» نوموړي دا څرګندونې د «برناما» خبري اژانس سره په مرکه کې، په داسې حال کې وکړې چې JETRO په دې وروستیو کې د ټیلر پوهنتون په کوربه‌توب د جاپاني پخلي د ویناوو لړۍ جوړه کړې وه.

تاکانو وویل، دا وضعیت په سوېل ختیځي اسیا کې د جاپان لپاره د یوه مهم بازار په توګه د ملایشیا د زیاتېدونکي اهمیت څرګندونه کوي او ښئي چې د ملایشیائي مصرفوونکو او سوداګریزو شرکتونو ترمنځ د جاپاني خوراکي محصولاتو تقاضا په دوامداره توګه د ودې په حال کې ده.

د جاپان د کرنې، ځنګلدارۍ او کب نیونې وزارت معلومات ښئي چې په ۲۰۲۵ کال کې ملایشیا ته د جاپان د کرهڼیزو، ځنګلدارۍ، کب نیونې او خوراکي محصولاتو صادرات ۲۹.۱ میلیارد ین، چې کابو ۷۵۶.۶ میلیونه ملایشیايي رینګیټ کېږي، ته رسېدلي؛ دا رقم د ۲۰۲۴ کال په پرتله ۲۶.۳ سلنه زیاتوالی ښيي.

دغه بهیر سږ کال لا چټک شوی دی. د جنورۍ او مئ میاشتو ترمنځ د جاپان صادرات ۱۵ میلیارډ َین، چې شاوخوا ۳۹۰ میلیونه رینګیټ کېږي، ته رسېدلي او د تېر کال د همدې مودې په پرتله ۴۲.۳ سلنه زیات شوي دي.

د معلوماتو له مخې، کرهنیز محصولات د ټولو صادراتو شاوخوا ۷۰ سلنه جوړوي، په داسې حال کې چې سمندري محصولات نږدې ۲۹ سلنه برخه لري.

د جاپاني سوداګریزو شرکتونو لپاره د ملایشیا جذابیت یوازې د دې هېواد د خلکو له لوري د سوشي، رامن او نورو جاپاني خوړو له زیاتېدونکې ګروهنې سره محدود نه دی.

تاکانو وویل چې د جاپاني دودیزو خوړو په اړه د پوهاوي زیاتوالی هم د دغې غوښتنې د ودې لامل شوی دی. دغه خواړه په ۲۰۱۳ کال کې د یونسکو د بشریت د ناملموس کلتوري میراث په نوملړ کې ثبت شوي دي.

هغه زیاته کړه چې برېښنايي سوداګري او جاپان ته د سفر کوونکو مالیزیایانو د شمېر زیاتوالی هم د جاپاني خوراکي محصولاتو د تقاضا په رامنځته کولو کې مرسته کوي.

نوموړي وویل: «په ټوله نړۍ کې د جاپاني ریستورانونو زیاتوالی ښئي چې جاپاني خواړه په نړیواله کچه ښه ځای پر ځای شوي دي.»

د جاپاني خوراکي توکو د صادراتو پراخ بهیر هم د ودې په حال کې دی. د ۲۰۲۶ کال په لومړۍ نیمائي کې د کرهڼیزو، ځنګلدارۍ، کب نیونې او خوراکي محصولاتو صادرات د تېر کال د همدې مودې په پرتله ۱۰.۹ سلنه زیات شوي او ۸۹۷.۷ میلیارد ین، چې شاوخوا ۲۳.۲ میلیارد رینګیټ کېږي، ته رسېدلي دي. دا د همدې مودې لپاره نوی ریکارډ بلل کېږي.

په توکیو کې مېشت «کیودو» خبري اژانس راپور ورکړی چې شین چای هم له هغو محصولاتو څخه دی چې د پام وړ پرمختګ یې کړی دی. د مچا د نړیوال شهرت او د سیاحت د ودې له امله د جاپاني خوړو په اړه نړیوال پوهاوی هم زیات شوی دی.

تاکانو ملایشیا یوازې د جاپاني خوراکي توکو د وروستي بازار په توګه نه، بلکې د جاپاني محصولاتو لپاره په ټولې آسه‌آن سیمې او نورو مسلمانو اکثریت لرونکو بازارونو کې د احتمالي پراختیايي مرکز په توګه ویني.

هغه وویل: ملایشیا یو څو توکمي او څو فرهنګي بازار دی چې له بېلابېلو پخلي دودونو او د نړیوالو خوړو له وړاندې کولو سره بلد دی.

هغه ټینګار وکړ: «دغه هېواد د انګریزي ژبې له پراخ استعمال، د نړیوالو هوټلونو له پرمختللې چینل، د حلالو خوراکي توکو له تولیدوونکو او ښوونیزو بنسټونو، د حلال تصدیق له سیستمونو، د خوراکي توکو د پروسس له وړتیاوو او لوژستیکي بیخ بینائيو څخه هم برخمن دی.

له همدې امله، د جاپاني هغو شرکتونو لپاره چې غواړي له دودیزو بازارونو هاخوا پراختیا ومومي، د ملایشیا حلال اکوسیستم کولای شي یوه مهمه سوداګریزه ګټه برابره کړي.

تاکانو وویل چې د بشري سرچینو پراختیا، د محصولاتو نوښت، د حلالو معیارونو لپاره چمتووالی او د وېش اغېزمنې  چینل کولای شي د دې لپاره یوه بېلګه وړاندې کړي چې جاپاني خواړه او خوراکي محصولات د آسه‌آن سیمې او نورو مسلمانو اکثریت لرونکو بازارونو ته ورسول شي.

https://iqna.ir/fa/news/4368777