د حضرت  امام حسین (ع) د اربعین پلي‌میلیوني لاریون په وروستیو کلونو کې د نړۍ په یوې ترټولو سترې  دیني غونډې  بدل شوی او د معنوي اړخونو ترڅنګ ئې د قرآن کریم او اهل‌بیتو (ع) د معارفو د بیانولو  لپاره هم بې‌ساری فرصت برابر کړی دی.

د قرآن کریم ممتاز  او غوره استاد  او د قرآنی  چارو قاضي ، محمد کاظمي، له ایکنانیوز  سره په مرکې کې د دې سترې غونډې په تړاو د قرآني ټولنې د رسالت په اړه خبرې وکړې او ټینګار ئې وکړ چې د  حسینی اربعین قرآني پروګرامونه باید یوازې له تشریفاتي او آییني لیدلوري ووځي او د عاشورا د غورځنګ د قرآني بنسټونو د بیانولو پر لور حرکت وکړي.

قاري باید «د قرآن ژبه» وي

دغه قرآني  استاد د حسینی اربعین په مراسمو کې د قرآني فعالیتونو یوازې د تلاوت تر محافلو محدودېدو   باندې نیوکه وکړه او وې ویل: د قرآن کریم تلاوت ارزښتناک او نه انکارېدونکی مقام لري، خو د قرآن د قاري رسالت یوازې د الهي آیتونو په لوستلو پورې نه محدودېږي. قاري باید  د قرآن ژبه  وي؛ یعنې  د قرآن مفاهیم، بنسټونه او منطق مخاطبانو ته  بیان کړی شي.

د قرآني  چارو دغه تکړه قاضی د قاریانو د علمي کچې د لوړولو پر اړتیا ټینګار وکړ او زیاته ئې کړه: دغه مقام ته رسېدل یوازې د غږ او لهجې په پیاوړتیا سره ممکن نه دي. قاري باید د قرآن کریم  څ خه له تفسیر، په آیتونو کې له تدبر او د قرآن له حفظ سره ژوره اړیکه ولري، څو د تلاوت ترڅنګ الهي پیغام هم خلکو ته منتقل کړای شي.

حسینی اربعین؛ د قرآن د معارفو د وړاندې کولو تر ټولو غوره فرصت

کاظمي د قرآني معارفو د منتقلولو لپاره د حسینی اربعین بې‌ساري ظرفیت ته په اشارې سره وویل: په دې ستره غونډه کې د بېلابېلو ذوقونو، کلتورونو او ملیتونو خلک د امام حسین (ع) د مینې پر محور سره راټولېږي. همدا ځانګړنه اربعین د قرآن کریم د معارفو د وړاندې کولو لپاره په تر ټولو غوره فرصت بدلوي.

https://iqna.ir/fa/news/4368130