ایکنا نیوز د سعودي «منبر» ورځپاڼې په حواله راپور راکړی، د قرآن کریم د حفظ، تلاوت او تفسیر  په باب د ملک عبدالعزیز د ۴۶  نړیوالو سیالیو مقدماتي پړاو  په مکې مکرمې کې پیل شوی او په دې توګه په مسجدالحرام کې پرون د وروستي پړاو ارزونې هم ترسره شوې.

د دغوسیالیو په مقدماتي پړاو کې، چې د سعودي عربستان د اسلامي چارو، دعوت او ارشاد وزارت له خوا ترسره کېږي، د قضاوت پلاوو د ډېر دقت او روڼتیا له معیارونو سره سم، او د هغو د نامتو نړیوالو قاضیانو تر څارنې لاندې چې د قرآن کریم د تلاوت په سټایلونو  او قواعدو کې تخصص لري، د نارینه او ښځینه ګډونوالو تلاوتونه واورېدل، څو معلومه کړي چې کوم ګډونوال وروستي پړاو ته لار پیدا کوي.

د دغو سیالیو په روانې مرحلې  کې د ۱۳۳ هېوادونو ۳۳۴ نارینه او ښځینه ګډونوال ګډون لري چې په پنځو څانګو کې له یو بل سره سیالي کوي:

۱. د قرآن کریم د ټول متن حفظ د اوو متواترو قرائتونو پر بنسټ او د «شاطبیه» طریقې له مخې، چې تلاوت او نظري پوهه، له غوره اجرا او د تجوید د قواعدو مراعاتول  ههم پکې شامل دي؛

۲. د قرآن کریم د ټول متن حفظ، له غوره اجرا، د تجوید د قواعدو مراعاتولو او د کلمو له  تفسیر سره؛

۳. د قرآن کریم د ټول متن حفظ، له غوره اجرا او د تجوید د قواعدو له مراعاتولو سره؛

۴. د قرآن کریم د پرله‌پسې ۱۵ سپارو یا جزؤ حفظ، له غوره اجرا او د تجوید د قواعدو په  مراعاتولو سره؛

۵. د قرآن کریم د پرله‌پسې پنځو سپارو یا جزؤ حفظ، له غوره اجرا او د تجوید د قواعدو په مراعاتولو سره.

دغه وزارت لا هم خپلې ټولې اسانتیاوې د دغې نړیوالې قرآني سیالۍ د بریالي ترسره کېدو لپاره کاروي. په دغو اقداماتو کې د برېښنائي قضاوت د سیستم پلي کول، د ګډونوالو د ارزونې د عدالت او دقت د تضمین لپاره د یوه جامع او منظم چوکاټ برابرول، او همدارنګه ګډونوالو ته د بېلابېلو خدمتونو وړاندې کول شامل دي.

د ملک عبدالعزیز د قرآن کریم نړیوالې سیالۍ په نړۍ کې له سترو قرآني سیالیو څخه ګڼل کېږي چې د نغدو جایزو ټوله اندازه ئې له ۱۰ میلیونو سعودي ریالو څخه اوړي.

https://iqna.ir/fa/news/4368541