محرم؛ عاشورا جلوس کی سیکورٹی پر وزیر اعلی کی زیر صدارت اہم اجلاس

اعلی حکام کو مکمل سیکورٹی کے حوالے سے بریفنگ میں یقین دہانی کرائی گیی کہ تمام انتظامات مکمل ہیں۔

ایکنا نیوز کے مطابق وزیراعلیٰ بلوچستان جام کمال خان کی زیر صدارت وزیراعلی سیکریٹریٹ میں منعقد ہونے والے اعلیٰ سطحی اجلاس میں صوبے میں امن و امان کی صورتحال اور محرم الحرام کے حوالے سے حفاظتی اقدامات کا جائزہ لیا گیا اور اس حوالے سے وزیراعلیٰ کو تفصیلی بریفنگ دی گئی۔

 صوبائی وزیر داخلہ میر ضیاء لانگو، صوبائی وزیر عبدالخالق ہزارہ، وزیراعلی کے پرنسپل سیکرٹری اور کمشنر کوئٹہ نے بھی اجلاس میں شرکت کی ، آئی جی پولیس محمد طاہر رائے اور دیگر پولیس حکام کی جانب سے اجلاس کو بریفنگ دی گئی اور بتایا گیا کہ عاشورہ محرم کے سیکیورٹی پلان مرتب کیا گیا ہے۔

اجلاس میں بتایا گیا کہ روٹس کی فضائی نگرانی بھی کی جائے گی۔ کوئٹہ سمیت دیگر اضلاع میں عاشورہ محرم کے جلوسوں کی فول پروف سیکیورٹی کو یقینی بنایا جارہا ہے، پولیس، لیویز، ایف سی اور انتظامیہ نے مشترکہ مربوط لائحہ عمل مرتب کیا ہے، اجلاس میں افغانستان میں تیزی سے بدلتی ہوئی صورتحال کا بھی جائزہ لیا گیا۔ وزیراعلیٰ نے سیکیورٹی اقدامات پر اطمینان کا اظہار کرتے ہوئے ہدایت کی کہ صوبے میں امن و امان کی صورتحال کو یقینی بنانے کے لیے بھرپور طریقے سے عملدرآمد یقینی بنایا جائے۔/