روس کی بلیو مسجد کو مصر کا قومی مصحف پیش
ایکنا کے مطابق، المصری الیوم کی خبر کے حوالے سے، اسامہ الازہری، وزیر اوقاف مصر نے "پہلی بین الاقوامی مذہبی کانفرنس" میں شرکت کے بعد روس کے شہر سینٹ پیٹرزبرگ میں مسجد آبی کا دورہ کیا۔ اس کانفرنس کا عنوان تھا: "روایتی ادیان میں روحانی اور اخلاقی اقدار کا کردار اور معاصر دنیا میں فرقوں اور نسلوں کے درمیان مکالمے کی اقدار کو مضبوط کرنے کے طریقے۔"
یہ کانفرنس گزشتہ ہفتے سینٹ پیٹرزبرگ اور روس کے شمال مغربی علاقے کے مسلمانوں کی مذہبی انتظامیہ، روس کے ایشیائی حصے کی مذہبی مسلم انتظامیہ، ماسکو کی ارتھوڈوکس چرچ کے خارجہ تعلقات کے شعبے، سینٹ پیٹرزبرگ اسٹیٹ یونیورسٹی، اور روس کے اسلامی ثقافت، سائنس، اور تعلیم کی حمایت کے فنڈ کے تعاون سے منعقد کی گئی۔
وزیر اوقاف مصر نے مسجد آبی کے دورے کے دوران ظہر کی نماز کی امامت کی اور مسجد کو مصر کے قومی مصحف کے نسخے تحفے میں دیے۔ اسامہ الازہری نے سن پطرسبرگ میں موجود الازہر کے ممتاز عالم محمد عیاد الطنطاوی کے مزار پر بھی حاضری دی اور اپنے خطاب میں کہا کہ شیخ الازہر حسن العطار کے حکم پر الطنطاوی کو 70 روزہ مشن کے لیے سینٹ پیٹرزبرگ بھیجا گیا تھا، لیکن انہوں نے اس شہر میں 21 سال گزارے اور "پولکوو" کے علاقے میں وفات پائی اور وہیں دفن ہوئے۔
انہوں نے مزید کہا کہ الطنطاوی نے عربی زبان اور اسلامی علوم پر مہارت کے ساتھ دیگر مذاہب اور فرقوں کے علماء و دانشوروں کے ساتھ خلوص اور بھائی چارے کا رشتہ قائم کیا اور روشن خیال مذہبی مکالمے کی ایک مثال بنے۔
قابل ذکر ہے کہ روس کی مسجد آبی 110 سال پرانی ہے اور ولادیمیر پوتن نے اسے دنیا کی خوبصورت ترین مساجد میں سے ایک قرار دیا ہے۔ اس مسجد کا گنبد 39 میٹر اور مینار 49 میٹر بلند ہے۔/
4243114
