Əsas diqqətim şagird yetişdirməkdir
Məsumə Həmidiyə, Ovqafın təşkil etdiyi 47-ci Ümumrespublika Quran Müsabiqəsinin təhqiq qiraəti üzrə final mərhələsinin iştirakçılarından biridir. O, bu müsabiqənin əyalət mərhələsində birinci yer tutduqdan sonra rəqibləri ilə yarışmaq üçün Təbriz şəhərinə gəlib.
Valideynlərinin təşviqi ilə beş yaşında Qurani-Kərimin 30-cu cüzünü əzbərləməklə Quran fəaliyyətinə başlayıb və 12 yaşında peşəkar şəkildə Quran oxuma və əzbərləmə sahəsinə daxil olub. Qurani-Kərimin tam əzbərlənməsi onun üçün üç il çəkib və miladi təqvimlə 2017-ci ildə Qurani-Kərimi tam əzbərləyib. O, 16 yaşından Qurani-Kərimin tədrisinə başlayıb və son illər ərzində səs və tələffüzün tədrisi sahəsində təcrübəyə malikdir. Hazırda da bir çox şagirdə dərs verir.
Bu Quran finalçısı indiyə qədər bir çox müsabiqədə iştirak edib və yüksək yerlər qazanıb. O cümlədən, İslam Dünyası üzrə Beşinci Beynəlxalq Şagirdlərarası Quran Müsabiqəsində birinci yer qazanıb.
Bu il Qurani-Kərimin tilavət növündə iştirak edən Məsumə Həmidiyə deyib: “Mən Qurani-Kərimin tam hafiziyəm, amma bu dövrdə təcvid qiraət növündə iştirak edirəm. Quranın əzbər müsabiqələrində iştirak etmək çoxlu streslə müşayiət olunur. Faydalı əzbərin əsas amillərindən biri Quran tələbəsinin bu yolda az da olsa, davamlı bir səylə çalışmasıdır.”
Həmidiyə bildirib ki, Ovqafın təşkil etdiyi Ümumrespublika Quran Müsabiqəsi İran İslam Respublikasında ən yüksək səviyyəli müsabiqədir və hər il onun keyfiyyəti artır.
Bu mükəmməl qiraətçi Qurani-Kərim sahəsində hansı plan və məqsədlərini müəyyən etdiyi ilə bağlı suala belə cavab verib: “Qurani-Kərim sahəsində əsas diqqətimi şagird yetişdirmək məqsədinə yönəltmişəm. Hesab edirəm ki, bu müsabiqədə iştirak edən Quran istedadları öz şəhərlərində tədris şəraiti yaradaraq öz səviyyələrində şagirdlər yetişdirməlidirlər.”
4252822
