Nyu-York meri vəzifəsinə müsəlman namizədin məscidə səfərinə reaksiyalar
“İQNA”-nın “New York Post”a istinadla verdiyi xəbərə görə, Zəhran Məmdaninin Nyu-Yorkda yerləşən bir məscidə etdiyi səfərlə bağlı fotosunun yayılması birmənalı qarşılanmayıb.
Sosialist namizəd Məmdani seçki kampaniyası çərçivəsində Bruklində yerləşən İbn Umeyr məscidinə gedərək cümə namazında iştirak edib. Bir neçə ay əvvəl həmin məscidin imamı Fələstinə dəstək məqsədilə İsrailin məhvini istədiyi üçün gündəmə gəlmişdi.
Sosial şəbəkə “X”də paylaşım edən Məmdani yazıb: “Bu gün Bay Ridge İslam Cəmiyyətində cümə namazında iştirak etmək mənim üçün şərəf idi.”
Məmdaninin bu səfəri, beş ay əvvəl Bay Ridge məscidində imam Əl-Baarın xütbə zamanı etdiyi çıxışdan sonra baş tutub. Həmin xütbədə imam Allahdan “Fələstini işğalçılardan və qarətçilərdən azad etməsini” diləmişdi.
Ərəb dilində danışan bu dini şəxs demişdi: “İlahi, torpaqlarını işğal edənləri, onlara xəyanət edib tək buraxanları və qanlarını tökənləri məhv et.” Əl-Baar həmçinin demişdi ki, Qəzzada Həmasın mücahidlərinin əldə etdiyi nailiyyətlər, 1967 və 1973-cü illərdəki ərəb ordularının uğurlarını belə geridə qoyub.
Məmdaninin bu addımı respublikaçılara yaxın media orqanlarının tənqidinə səbəb olub. Bundan əvvəl Donald Tramp Məmdaninin meri olmasına qarşı çıxaraq demişdi ki, əgər Məmdani seçkilərdə qalib gəlsə, Nyu-York şəhərini “islah” edəcək.
Tramp Məmdanini istehza ilə “kommunist” adlandıraraq bildirmişdi: “Əgər demokratlar seçkidə indiki mer Erik Adamsı vəzifədən uzaqlaşdırsa, şəhərin idarəsinə qarışmaq üçün addımlar atacağıq.”
Ağ Evdə keçirilən kabinet iclasında Tramp demişdi: “Bəlkə də vəziyyəti Vaşinqtondan idarə etməli olacağıq. Biz Nyu-Yorku yenidən möhtəşəm edəcəyik.” O, Vaşinqtonu Nyu-Yorkla müqayisə edərək iddia edib ki, şəhərin büdcəsinin əhəmiyyətli hissəsi federal hökumətdən asılıdır və bu səbəbdən də Vaşinqtonun şəhər idarəçiliyinə müdaxilə səlahiyyəti var.
Tramp iddia edib: “Əgər Nyu-Yorkun idarəsinə bir kommunist seçilsə, bu şəhər bir daha əvvəlki kimi olmayacaq. Amma Ağ Evdə bizim məcbur olduğumuz yerləri idarə etmək üçün fövqəladə səlahiyyətlərimiz var.”
Buna cavab olaraq Məmdaninin seçki qərargahı bəyan edib ki, Trampa şəhəri məhv etməyə icazə verməyəcək. Onun sözçüsü deyib: “Donald Tramp bir daha demokratiyaya bir təklif kimi yanaşmaq qərarına gəlib və Zəhran Məmdaniyə səs verən yarım milyondan çox nyu-yorklunun heysiyyətini alçaldıb.”
4293424
