Təl-Əvivdə Qəzza müharibəsinin dayandırılması və əsirlərin azad edilməsi üçün etiraz aksiyası keçirilib

İQNA - Sionist rejimin mediası xəbər verib ki, müharibənin davamına etiraz edən nümayişçilər Təl-Əvivin əsas küçələrini bağlayaraq və nazirlərin evlərinin qarşısında toplaşaraq əsirlərin qaytarılmasını tələb ediblər.

“Əl-Cəzirə”nin məlumatına görə, çərşənbə axşamı Təl-Əvivdə Qəzza müharibəsinin dayandırılması və əsirlərin azad edilməsi üçün keçirilən genişmiqyaslı etirazlarla eyni vaxtda israilli əsirlərin ailələri, rejimin baş naziri Benyamin Netanyahuya, hakimiyyətdə qalmaq üçün onların yaxınlarını qurban vermək qərarı verdiyi ittihamını yönəldiblər.

İsrailli əsirlərin ailələri Netanyahunu istənilən qiymətə hakimiyyətdə qalmağa çalışmaqda ittiham edərək bəyan ediblər: “Qəzzada soyqırıma görə Beynəlxalq Cinayət Məhkəməsi tərəfindən təqib olunan Netanyahu hökuməti, övladlarının ölümünə səbəb olacaq hədəfsiz bir müharibə aparır”.

Eyni zamanda, Qəzzada əsir saxlanılan israillilərdən birinin anası Einav Tsangauker Netanyahunu əsir mübadiləsi razılaşmasının qarşısındakı əsas maneə adlandıraraq İsrail xalqını ailələrə dəstək üçün küçələrə çıxmağa çağırıb.

Bu etirazlar israilli əsirlərin ailələrinin, yaxınlarının azad olunmasını təmin edəcək bir mübadilə razılaşmasına nail olmaq üçün təzyiqlərini artırdığı bir vaxtda keçirilir.

İsrailin qiymətləndirmələrinə görə, Həmasın əlində 50 israilli əsir var ki, onlardan 20 nəfəri sağdır.

Digər tərəfdən, İsrailin öz zindanlarında 10 min 800-dən çox fələstinlini saxladığı bildirilir. Hüquq-müdafiə təşkilatları isə həmin məhbusların işgəncəyə və tibbi laqeydliyə məruz qaldığını xəbər verirlər.

4301710