Müsəlman fəqihlərinin konfransı Malayziyanın paytaxtında keçirildi
“Vas” xəbər agentliyinin məlumatına görə, İslam Aləmi Birliyinə bağlı İslam Fiqh Məclisinin təşkil etdiyi bu konfransda Malayziya rəsmiləri, Səudiyyə Ərəbistanı rəsmiləri, eləcə də digər İslam ölkələrindən fəqihlər və alimlər iştirak ediblər.
Səudiyyə Ərəbistanının baş müftisi Şeyx Əbdüləziz bin Abdullah Əl Şeyx çıxışında bildirib: “Fiqh dəqiq bir elmdir və xüsusi ixtisas tələb edir. Bu gün Səudiyyə Ərəbistanının İslam kitabxanası misilsiz fiqhi əsərlərlə doludur.”
O, ümid etdiyini bildirib ki, bu konfrans İslam fiqhinin tələbələrinə daha yaxından çatdırılması, həmçinin İslam dünyasının universitetlərində fiqh tədrisinin üsullarının araşdırılması istiqamətində tədqiqatlar və təkliflərə yol açacaq.
İslam Aləmi Birliyinin baş katibi Dr. Məhəmməd bin Əbdülkərim əl-İsa da çıxışında vurğulayıb ki, İslam fiqhi öz zəngin tarixi boyunca təfsilatı dəlillərdən çıxarılan əməli furu hökmlərini tanımaq üçün şəri mənbə olub və bu gün də belədir, müsəlmanları dinləri barədə agah edir.
O, izah edib ki, böyük ümmət fəqihləri səmimi niyyətlər, geniş baxış, təmiz qəlb və möhkəm elm əsasında məzhəblərarası elmi əlaqələri və fiqhi ədəbiyyatı möhkəmləndirməklə İslam ümmətinin birliyinin güclənməsinə mühüm töhfə veriblər. Elm meydanı onlar üçün sevimli olub və İslamın uca ədəbiyyatı ilə bəzənib.
Məscidül-Həramın xətibi Şeyx Salih bin Abdullah bin Humeyd də vurğulayıb ki, İslam fiqhi sabit və dəyişməz hökmlərdən ibarət deyil, əksinə, zaman keçdikcə inkişaf edən canlı bir elmdir. O, kitab və sünnədən götürülür, dövrün reallıqları ilə uzlaşır, lakin öz ilkin prinsiplərini qoruyub saxlayır.
Eyni zamanda, Malayziyanın Federal Əyalətlər Müftisi də sürətli və mürəkkəb dəyişikliklər fonunda ictimai ictihadın əhəmiyyətini vurğulayıb. O bildirib ki, müasir həyat texnoloji inkişafla birlikdə əvvəlki dövrlərdə mövcud olmayan yeni fiqhi məsələlər ortaya çıxarıb. Buna görə də şəriətin məqsədlərinə uyğun və ümmətin mənafelərini qoruyan hökmlərin çıxarılması üçün dəqiq metod və mexanizmlərə ehtiyac var.
İslam Fiqh Məclisi bu konfransın sonunda İslam fiqh elminin tədrisində mühüm və yeni məsələləri müzakirə edib, müasir fəqihin formalaşmasında əsas xüsusiyyətləri və meyarları nəzərdən keçirərək yekun bəyanat qəbul edib. Bu bəyanatda iştirakçılar fiqhi məclislərin fiqhi ictihadı təşkil etməkdə təqdim etdiyi müasir və qabaqcıl modeldən razılıqlarını bildiriblər. Yekun sənəddə həmçinin İslam fiqh dərslərinin istiqamətini və fəqihlərin yetişdirilməsini tənzimləyib inkişaf etdirə biləcək, müasir fiqhi çağırışlarla üzləşmək imkanını artıracaq bir sıra tövsiyələr də yer alıb.
İştirakçılar Malayziya hökumətinə bu konfransı təşkil etdiyinə görə təşəkkür edib və bu tədbirin digər İslam ölkələrində də keçirilməklə dövri toplantıya çevrilməsini istəyiblər. Məqsəd müsəlman fəqihləri arasında əlaqələri gücləndirmək və onların şəri və elmi məsələlərdə fikir mübadiləsini asanlaşdırmaqdır.
4302114
