Qüdsdəki Əl-Əqsa Məscidinin İslam Muzeyində tarixi Quran əlyazmalarının sərgisi
“Əl-Cəzirə”nin verdiyi məlumata görə, muzeydəki bu nadir Quran nüsxələri Əməvilər və Abbasilər dövründən başlayaraq Fatimilər, Əyyubilər, Məmlüklər və hətta Osmanlı dövrünə qədər olan mərhələlərdə məscidə bağışlanmışdır.
Bu qiymətli Quran nüsxələri xilafət başçıları, sultanlar, şahzadələr, alimlər və görkəmli İslam şəxsiyyətləri tərəfindən Əl-Əqsa Məscidinə vəqf edilmişdir.
Nüsxələr xətt, bəzək və ölçülərinə görə bir-birindən fərqlənir. Onlar kufi, məğribi, nəsh, sülus və fars xətti ilə yazılmışdır.
Əl-Əqsa Məscidinin İslam Muzeyi təxminən 600 nadir Quran nüsxəsini özündə cəmləşdirir. Bunların içərisində Sultan Süleyman Qanuninin “Rübəsi”, Sultan Bəyazid Osmanlının “Rübəsi”, Sultan Bərsbay Məmlükiyə aid böyük Quran nüsxəsi, həmçinin Həzrət Məhəmmədin (s) nəsillərindən birinə aid olduğu güman edilən bir əlyazma da vardır.
Ən diqqətəlayiq nüsxələrdən biri 8 və ya 9-cu əsrə aid kufi xətti ilə yazılmış Quran, həmçinin “Ər-Rubəl-Məğribiyyə”dir. Bu, 30 cüzdən ibarət Quran nüsxəsidir və Mərakeş hökmdarlarından Sultan Əbulhəsən Mərini tərəfindən 13-cü əsrin əvvəllərində bağışlanmışdır. Bu nüsxə onun Məkkədəki Məscidül-Harama, Mədinədəki Məscidün-Nəbiyə və Qüdsdəki Əl-Əqsa Məscidinə hədiyyə etdiyi üç nüsxədən günümüzə qədər qalan yeganəsidir.
Muzey həmçinin 14-cü əsrə aid, uzunluğu 1 metr, eni isə 90 santimetr olan böyük bir Quran nüsxəsini də özündə saxlayır.
4302136
